హైదరాబాద్‌కు ఛత్తీస్‌గఢ్ సీఎం.. స్వాగతం పలికిన మంత్రి ఉత్తమ్

హైదరాబాద్‌: ఛత్తీస్‌గఢ్ ముఖ్యమంత్రి విష్ణుదేవ్ సాయ్(Chhattisgarh CM Vishnu Deo Sai) హైదరాబాద్‌లో పర్యటించారు. తెలంగాణ నీటిపారుదల శాఖ మంత్రి ఉత్తమ్ కుమార్ రెడ్డి(Minister Uttam Kumar Reddy ) ఛత్తీస్‌గఢ్ సీఎంకు స్వాగతం పలికారు. ఉత్తమ్ కుమార్ రెడ్డి సమ్మక్క సాగర్ ఎత్తిపోతల పథకానికి ఛత్తీస్‌గఢ్ ప్రభుత్వ నుంచి ఎన్‌ఓసీ (No Objection Certificate) పత్రం కోరారు. ఛత్తీస్‌గఢ్ ప్రభుత్వం పెట్టుబడుల ఆకర్షణకు హైదరాబాద్‌లో ఇన్వెస్టర్ కనెక్ట్ నిర్వహించింది. తెలంగాణ పారిశ్రామికవేత్తలతో(Telangana Entrepreneurs) సీఎం విష్ణుదేవ్ సాయ్ సమావేశం నిర్వహించారు.

ఛత్తీస్‌గఢ్ ముఖ్యమంత్రి విష్ణు దేవ్ సాయి మాట్లాడుతూ, “మా అధికారులు ఛత్తీస్‌గఢ్ నూతన పారిశ్రామిక విధాన వివరాలను సమర్పించారు. దేశానికి నడిబొడ్డున ఉన్న ఛత్తీస్‌గఢ్, ఖనిజ సంపదతో ఎలా సమృద్ధిగా ఉందో వారు ప్రముఖంగా వివరించారు. మా నూతన పారిశ్రామిక విధానాన్ని అధ్యయనం చేసి, అర్థం చేసుకోవడానికి, ఛత్తీస్‌గఢ్‌లో పెట్టుబడులు పెట్టడానికి మిమ్మల్ని ఆహ్వానించడానికే మేము ఇక్కడికి వచ్చాము. సుమారు 7,800 మందికి ఉపాధి కల్పించే, దాదాపు రూ.9,580 కోట్ల విలువైన అవగాహన ఒప్పందం (MoU) ఈరోజు కుదరడం మాకు గొప్ప గౌరవం. మా నూతన పారిశ్రామిక విధానం కారణంగా, ఇటీవల ఛత్తీస్‌గఢ్‌లో సుమారు రూ.8 లక్షల కోట్ల విలువైన అవగాహన ఒప్పందాలు కుదిరాయి. ఈ ప్రాజెక్టులపై పనులు ఇప్పటికే ప్రారంభమయ్యాయి. ఈ విధానం ప్రవేశపెట్టినప్పటి నుండి, ఏఐ (AI), ఐటీ (IT), సెమీకండక్టర్ల వంటి రంగాలలో గణనీయమైన పురోగతి సాధించబడుతోంది.” అని ఛత్తీస్‌గఢ్ ముఖ్యమంత్రి పేర్కొన్నారు.