నల్గొండలో నలుగురు హత్య.. కేసులో వీడిన మిస్టరీ

హైదరాబాద్: నల్గొండ జిల్లాలో(Nalgonda) సంచలనం రేపిన హత్యల కేసులో పురోగతి లభించింది.గత శుక్రవారం తెలంగాణ కాలనీలోని ఒక ఇంట్లో కుళ్ళిన స్థితిలో ఉన్న నాలుగు మృతదేహాలు లభ్యమైన ఘటనకు సంబంధించిన మిస్టరీ వీడిందని పోలీసులు తెలిపారు. ఈ నేరంలో మరణించిన మహిళ కుమార్తె, అల్లుడి ప్రమేయం ఉండవచ్చని పోలీసులు అనుమానిస్తున్నారు. మరణించిన వారిని మహ్మద్ సుల్తాన్, అతని భార్య హసీనా, ముజ్జమిల్, అఫ్రాజాగా గుర్తించారు. వీరు నలుగురూ తమ నివాసంలోనే గుర్తుతెలియని దుండగుల చేతిలో హత్యకు గురైనట్లు సమాచారం.

ఈ హత్యలకు ఆస్తి వివాదమే కారణమని పోలీసులు అనుమానిస్తున్నారు. నివేదికల ప్రకారం, హసీనా కుమార్తె, అల్లుడితో సహా ఎనిమిది మందిని ఈ కేసులో అదుపులోకి తీసుకున్నారు. హసీనాకు గతంలోనే వివాహం జరిగిందని, ఆ వివాహం ద్వారా ఆమెకు ఒక కుమార్తె ఉందని విచారణలో వెల్లడైంది. ఆమె సుమారు రూ. కోటి విలువైన ఆస్తిని కలిగి ఉన్నట్లు సమాచారం. తన ఆస్తిని సుల్తాన్, ముజ్జమిల్, అఫ్రాజాలతో పంచుకోవాలని హసీనా అనుకుంటున్న విషయం ఆమె కుమార్తెకు తెలిసిందని పోలీసులు గుర్తించారు. ఆస్తుల విభజన ప్రతిపాదనపై ఆగ్రహం చెందినట్లు భావిస్తున్న కుమార్తె, ఆమె భర్త, ఆ కుటుంబాన్ని అంతం చేయడానికి హైదరాబాద్‌లోని పాతబస్తీ ప్రాంతానికి చెందిన ఆరుగురు వ్యక్తులను నియమించుకున్నట్లు సమాచారం. దీనిపై తదుపరి విచారణ జరుగుతోందని పోలీసులు తెలిపారు.