మహబూబాబాద్, నవంబర్ 30 (విజయక్రాంతి): రాష్ట్రంలో సోమవారం (డిసెంబర్ 1) నుండి కొత్త బ్రాండీ షాపులను ప్రారంభించేందుకు ఏర్పాటు చేస్తున్నారు. రెండేళ్ల పాటు కొత్త మద్యం షాపుల ఏర్పాటు కోసం ప్రభుత్వ ఇటీవలే లక్కీ డ్రా నిర్వహించింది. ఇందులో భాగంగా మద్యం షాపులు పొందిన యజమానులు కొత్త బ్రాండీ షాపులు ప్రారంభించడానికి యుద్ధ ప్రాతిపదికన చర్యలు చేపట్టారు. ఇప్పటికే పలుచోట్ల కొత్త ప్రదేశాల్లో మద్యం షాపులను ఏర్పాటు చేసే విధంగా ఏర్పాట్లు చేసుకుంటున్నారు.

కొందరు ముందుగానే తాము ఏర్పాటు చేయదలచిన ప్రాంతాల్లో అద్దె భవనాలకు తగిన ఏర్పాట్లను చేసుకుని సోమవారం నుండి మద్యం విక్రయించేందుకు సన్నాహాలు పూర్తి చేశారు. మరికొందరు అనుకూలంగా ఉన్న చోట ఇప్పటికే ఉన్న పాత మద్యం షాపుల్లోనే కొనసాగించేందుకు తగిన ఏర్పాట్లు చేసుకుంటున్నారు.

కొత్తగా మద్యం షాపులు ఏర్పాటు చేసే చోట సిట్టింగ్ నిర్వహించి నీళ్లు, చిరు తిండి విక్రయించేందుకు క్యాంటీన్ ఏర్పాటు చేసుకుంటున్నారు. మద్యం షాపులో యజమానులు మాత్రం సిట్టింగ్ పర్మిట్ తీసుకొని మద్యం అక్కడే సేవించే విధంగా అణువుగా ఏర్పాటు చేస్తున్నారు. మహబూబాబాద్ జిల్లాలో 61 మద్యం షాపులు కొత్తగా సోమవారం నుండి అమ్మకాలు ప్రారంభించానున్నాయి.