చిన్న కుమ్మరి కుంట పూడికతీతకు అనుమతివ్వాలి

భూగర్భ జలాల పరిరక్షణకు రైతుల విజ్ఞప్తి

హుస్నాబాద్: సిద్దిపేట జిల్లా హుస్నాబాద్ పట్టణంలోని మహమ్మదాపూర్ రోడ్డులో ఉన్న చిన్న కుమ్మరి కుంట పూడికతీత పనులకు వెంటనే అనుమతులు మంజూరు చేయాలని బుధవారం చుట్టుపక్కల రైతులు అధికారులను కోరారు. పూర్వకాలం నుంచి సాగునీటి అవసరాలను తీర్చిన ఈ కుంట ప్రస్తుతం పూడికతో నిండిపోవడంతో భూగర్భ జలాలు అడుగంటిపోయి రైతులు తీవ్ర ఇబ్బందులు ఎదుర్కొంటున్నట్లు ఆవేదన వ్యక్తం చేశారు.

రైతుల వివరాల ప్రకారం, సర్వే నంబర్ 81లో సుమారు ఒక ఎకరం 12 గుంటల విస్తీర్ణంలో ఉన్న చిన్న కుమ్మరి కుంట ఎన్నో ఏళ్లుగా సమీపంలోని వ్యవసాయ భూములకు నీటి వనరుగా నిలిచింది. అయితే గత కొన్ని సంవత్సరాలుగా కుంటను పూడికతీయకపోవడంతో నీటి నిల్వ సామర్థ్యం పూర్తిగా తగ్గిపోయిందని తెలిపారు. దీంతో కుంటలో నీరు నిలవక, పరిసర ప్రాంతాల్లోని బావులు, బోర్లలో నీటి మట్టం గణనీయంగా పడిపోయి పంటల సాగు కష్టసాధ్యంగా మారిందని చెప్పారు.

2023 నుంచే అధికారుల దృష్టికి సమస్యను తీసుకెళ్లినా ఇప్పటివరకు శాశ్వత పరిష్కారం చూపలేదని రైతులు ఆరోపించారు. కుంటకు హద్దులు నిర్ణయించడం మినహా, దాని విస్తీర్ణం, నీటి నిల్వ సామర్థ్యాన్ని సూచించే బోర్డు కూడా ఏర్పాటు చేయలేదని పేర్కొన్నారు. రాజకీయాలకు అతీతంగా రైతుల సంక్షేమాన్ని దృష్టిలో ఉంచుకుని చిన్న కుమ్మరి కుంట పూడికతీతకు వెంటనే అనుమతి ఇవ్వాలని, కుంటలోని మట్టిని తొలగించి నీటి నిల్వ సామర్థ్యాన్ని పెంచేందుకు అధికారులు చర్యలు తీసుకోవాలని రైతులు విజ్ఞప్తి చేశారు. దీంతో భూగర్భ జలాలు పునరుద్ధరించబడటంతో పాటు వ్యవసాయానికి మేలు జరుగుతుందని ఆశాభావం వ్యక్తం చేశారు.