రేపు ముంబైలో మాక్రాన్‌తో ప్రధాని సమావేశం

న్యూఢిల్లీ: ప్రధానమంత్రి నరేంద్ర మోడీ(Prime Minister Narendra Modi) మంగళవారం ముంబైలో ఫ్రెంచ్ అధ్యక్షుడు ఇమ్మాన్యుయేల్ మాక్రాన్‌తో భేటీ కానున్నారు. ఈ సమావేశంలో ఇద్దరు నాయకులు భారతదేశం-ఫ్రాన్స్(India-France) వ్యూహాత్మక భాగస్వామ్యంలో సాధించిన పురోగతిని సమీక్షిస్తారు. మోడీ- మాక్రాన్ చర్చలు వ్యూహాత్మక సంబంధాలను సుస్థిరం చేసుకోవడం, కొత్తగా ఉద్భవిస్తున్న రంగాలలోకి మరింత వైవిధ్యపరచడంపై దృష్టి సారిస్తారు. ప్రాంతీయ, ప్రపంచ ప్రాముఖ్యత కలిగిన అంశాలపై ప్రధాని మోదీ, అధ్యక్షుడు మాక్రాన్ అభిప్రాయాలను పంచుకోనున్నారు.

"ప్రధానమంత్రి నరేంద్ర మోడీ ఫిబ్రవరి 17న ముంబైకి వెళ్లి ఫ్రాన్స్ అధ్యక్షుడు ఇమ్మాన్యుయేల్ మాక్రాన్‌ను కలుస్తారు" అని అధికారిక ప్రకటన తెలిపింది. ఈ సమావేశాల సందర్భంగా, భారతదేశం-ఫ్రాన్స్ వ్యూహాత్మక భాగస్వామ్యంలో సాధించిన పురోగతిని ఇరువురు నాయకులు సమీక్షిస్తారని ప్రకటన పేర్కొంది. భారతదేశం ఆతిథ్యం ఇచ్చే ఏఐ ఇంపాక్ట్ సమ్మిట్‌లో పాల్గొనడానికి, అలాగే ముంబైలో ప్రధానమంత్రితో ద్వైపాక్షిక శిఖరాగ్ర సమావేశాన్ని నిర్వహించడానికి ప్రధానమంత్రి మోదీ ఆహ్వానం మేరకు అధ్యక్షుడు మాక్రాన్ ఫిబ్రవరి 17-19 వరకు భారత్ లో పర్యటించనున్నారు.

ఇది మాక్రాన్ భారత్ నాల్గవ పర్యటన, ముంబైకి ఆయన మొదటి పర్యటన. ఫిబ్రవరి 17న మధ్యాహ్నం 3:15 గంటలకు, ఇద్దరు నాయకులు ముంబైలోని లోక్ భవన్‌లో ద్వైపాక్షిక సమావేశాల్లో పాల్గొంటారు. తరువాత, సాయంత్రం 5:15 గంటలకు, ఇద్దరు నాయకులు భారతదేశం-ఫ్రాన్స్ ఆవిష్కరణ సంవత్సరం 2026ని ప్రారంభిస్తారు. రెండు దేశాల నుండి వ్యాపార నాయకులు, స్టార్టప్‌లు, పరిశోధకులు,ఇతర ఆవిష్కర్తల సమావేశంలో ప్రసంగిస్తారు.