సర్టిఫికెట్ ను రద్దు చేయాలంటూ తహసిల్దార్ కార్యాలయం ముందు బైఠాయింపు..

సుల్తానాబాద్ (విజయక్రాంతి): పెద్దపెల్లి జిల్లా సుల్తానాబాద్ మండలంలోని  తోగర్రాయి గ్రామానికి చెందిన ఎస్సీ మహిళా చిలుక స్రవంతి బీసీ "సీ" సర్టిఫికెట్ తీసుకొని సర్పంచ్ గా నామినేషన్ దాఖలు చేయడం నిరసిస్తూ గ్రామంలోని వివిధ కుల సంఘాల ఆధ్వర్యంలో శనివారం సుల్తానాబాద్ తహసిల్దార్ కార్యాలయానికి తరలివచ్చారు. ఎస్సీ మహిళకు ఇచ్చిన బీసీ "సీ" సర్టిఫికెట్ వెంటనే రద్దు చేయాలని కార్యాలయం ముందు ఆందోళన చేశారు. అనంతరం తహసిల్దార్ గిరికి వినతి పత్రం అందజేశారు. ఈ సందర్భంగా గ్రామస్తులు మాట్లాడుతూ బీసీ మహిళలకు వచ్చిన అవకాశాన్ని సర్టిఫికెట్ రూపంలో హరించడం సరికాదని వారు ఆగ్రహం వ్యక్తం చేశారు. బీసీ మహిళల హక్కులను కాలరాయాలని చూస్తున్న సర్టిఫికేట్ ను అధికారులు రద్దు చేయాలని కోరారు.

కేవలం సర్పంచ్ ఎన్నికల కోసమే బీసీ "సీ" సర్టిఫికెట్ తీసుకోవడం జరిగిందినీ వారు ఆరోపించారు. ఎస్సీ మహిళా క్రిస్టియన్ గా కన్వర్ట్ అయి బీసీ "సీ" సర్టిఫికెట్ పొంది నామినేషన్ దాఖలు చేశారని వారన్నారు, అధికారులు తక్షణమే స్పందించి బీసీ మహిళలకు న్యాయం చేయాలని, తక్షణమే సర్టిఫికెట్ రద్దు చేయాలని కోరారు. చివరికి బీసీల స్థానంలో కూడా సర్టిఫికెట్ తో పోటీ చేయాలని నిర్ణయించుకోవడం సరికాదన్నారు. సర్టిఫికెట్ రద్దు చేయకుంటే ఆందోళన ఉదృతం చేస్తామన్నారు. గర్రెపల్లి సింగిల్ విండో చైర్మన్ జూపల్లి సందీప్ రావు, నాయకులు బోయిని రాజమల్లయ్య, సూర శ్యామ్ లతో పాటు తదితరులు మద్దతు తెరిపారు. ఈ కార్యక్రమంలో గుండ మురళి, శ్రీనివాస్, రాయమల్లు, గ్రామస్తులు చంద్రమౌళి, శంకరయ్య, భాస్కర్ రెడ్డి, శేఖర్, శంకరయ్య, కొమురయ్య, తిరుమల, రాధా, తార, భూలక్ష్మితో పాటు తదితరులున్నారు.

తహసిల్దార్ గిరి వివరణ...

నిబంధనల ప్రకారమే సర్టిఫికెట్ జారీ చేయడం జరిగిందని, ఇందులో తమ తప్పేం లేదని తహసిల్దార్ గిరి వివరణ ఇచ్చారు.