పున్నాగ
03-11-2025 12:56 AM
జ్ఞాపకాలను పున్నాగ పూలుగా
రాలుస్తున్నది ఈ శరదృతువు
రెండు పూలను అందుకుని
బాల్యపు పరిమళాన్ని ఒంటికి పూసుకున్నాను
వాన కురిసిన రోజూ
ఈ పూలజల్లు ఆగదు !
అవి భువికి దిగివస్తున్న తెల్ల పావురాల్లా ఉన్నాయి !
పైకి తలెత్తి చూస్తే
చూపులనిండా పున్నాగ పూలే!
అవి తెల్లటి నక్షత్రాల్లా
మెరుస్తున్నాయి !
మన విన్నపాలను
దైవానికి చేరవేసే
కల్పవృక్షంలా కనిపిస్తోంది పున్నాగ చెట్టు!






