పంజాబ్: పాకిస్థాన్(Pakistan)కు సమాచారం చేరవేశాడనే ఆరోపణలపై ఒక వ్యక్తిని పోలీసులు మంగళవారం అరెస్టు చేశారు. ఈ సందర్భంగా పంజాబ్ డైరెక్టర్ జనరల్ ఆఫ్ పోలీస్ గౌరవ్ యాదవ్(Punjab Director General of Police Gaurav Yadav) మాట్లాడుతూ... తర్న్ తరన్ లోని మొహల్లా రోడుపూర్ నివాసి గగన్ దీప్ సింగ్ అలియాస్ గగన్ ఆపరేషన్ సిందూర్(Operation Sindoor) సమయంలో సైన్యం కదలికలకు సమాచారాన్ని పాకిస్తాన్ ఇంటెలిజెన్స్ ఆపరేటివ్స్(Pakistani intelligence operatives)తో పంచుకున్నారనే ఆరోపణలపై అతన్ని అరెస్టు చేశారు. పోలీసులు సమాచారం ఉన్న మొబైల్ ఫోన్ ను కూడా స్వాధీనం చేసుకున్నారు. అతను పాకిస్తాన్ కేంద్రంగా పనిచేస్తున్న ఖలిస్తాన్ అనుకూల నాయకుడు గోపాల్ సింగ్ చావ్లా(Gopal Singh Chawla)తో కూడా సంప్రదింపులు జరిపాడని ఆరోపణలు ఉన్నాయి. 

నిందితుడు పాకిస్తాన్ నిఘా సంస్థ ఇంటర్-సర్వీసెస్ ఇంటెలిజెన్స్ (ISI) తో సంప్రదింపులు జరిపాడని, సమాచారాన్ని అందించడానికి డబ్బు కూడా అందుకున్నాడని పోలీసులు తెలిపారు. ఈ నేపథ్యంలో తర్న్ తరన్ పోలీసులు, కౌంటర్ ఇంటెలిజెన్స్ విభాగం సంయుక్తంగా ఆపరేషన్‌ నిర్వహించి నిందితుడిని అదుపులోకి తీసుకున్నారు. గగన్ దీప్ గత ఐదు సంవత్సరాలుగా ఖలిస్తానీ మద్దతుదారు చావ్లాతో సంప్రదింపులు జరుపడంతోనే నిందితునికి పీఐఓలు పరిచయం అయ్యారని, నిందితుడు పీఐఓలతో పంచుకున్న నిఘా సమాచారం ఉన్న మొబైల్ ఫోన్ ను, 20కి పైగా ఐఎస్ఐ కాంటాక్ట్ ల వివరాలను స్వాధీనం చేసుకున్నట్లు యాదవ్ చెప్పారు.

ఈ గూఢచర్య నెట్ వర్క్ పూర్తి పరిధిని స్థాపించడానికి, ఇతర సంబంధాలను గుర్తించడానికి సమగ్ర ఆర్థిక సాంకేతిక దర్యాప్తులు జరుగుతున్నాయని, టార్న్ తరణ్ పోలీస్ స్టేషన్ లో అధికారిక రహస్యాల చట్టం కింద ఎఫ్ఐఆర్ నమోదు చేయబడిందని, తదుపరి దర్యాప్తు జరుగుతోందని డిజిపి పేర్కొన్నారు. ఏప్రిల్ 22న జరిగిన పహల్గామ్ ఉగ్రవాద దాడిలో 26 మంది ప్రాణాలు కోల్పోయినందుకు ప్రతీకారంగా, ఆపరేషన్ సిందూర్ పేరుతో భారత సాయుధ దళాలు మే 7న తెల్లవారుజామున పాకిస్తాన్, పాక్ ఆక్రమిత కాశ్మీర్ లోని తొమ్మిది ఉగ్రవాద లక్ష్యాలపై క్షిపణి దాడులు నిర్వహించిన విషయం తేలిసిందే. వీటిలో జైష్-ఎ-మొహమ్మద్ బలమైన స్థావరం బహవల్పూర్, మురిద్కేలోని లష్కరే-ఎ-తోయిబా స్థావరం ఉన్నాయి.  

అమృత్ సర్ లోని అజ్నాలా నుండి ఫలక్షేర్ మాసిహ్ మరియు సూరజ్ మాసిహ్ లను, మాలెర్ కోట్లా నివాసితులైన 31 ఏళ్ల మహిళ గుజాలా, యామీన్ మొహమ్మద్ లను గత నెలలో అరెస్టు చేశారు.  గుజాలా యమీన్ రహస్య సమాచారాన్ని పంచుకోవడానికి బదులుగా ఆన్ లైన్ లావాదేవీల ద్వారా చెల్లింపులు అందుకుంటున్నారు. గుజాలా పాకిస్తాన్ హైకమిషన్ లో పోస్ట్ చేయబడిన పాకిస్తాన్ అధికారి ఎహ్సాన్-ఉర్-రహీం అలియాస్ డానిష్ తో సంబంధాలు ఉన్నట్లు సమాచారం. మే 13న గూఢచర్యానికి పాల్పడుతున్నాడని ఆరోపిస్తూ భారతదేశం డానిష్ ను బహిష్కరించింది. పాకిస్తాన్ ఐఎస్ఐతో సున్నితమైన సైనిక సమాచారాన్ని పంచుకున్నందుకు గురుదాస్ పూర్ నుండి సుఖ్ ప్రీత్ సింగ్, కరణ్ బీర్ సింగ్ అనే మరో ఇద్దరు వ్యక్తులను పోలీసులు తరువాత అరెస్టు చేశారు.