ఎల్ నినో ప్రభావం.. వరి సాగుపై పునరాలోచించండి

ప్రత్యామ్నాయ పంటలు సాగు చేయాలి: కేవీకే, వ్యవసాయ శాఖ సూచన

బూర్గంపాడు,(విజయక్రాంతి): ఎల్ నినో వాతావరణ పరిస్థితుల నేపథ్యంలో రైతులు ఈ ఖరీఫ్‌లో వరి సాగుకు దూరంగా ఉండాలని, స్వల్పకాలిక ప్రత్యామ్నాయ పంటలను ఎంచుకోవాలని భద్రాద్రి కొత్తగూడెం జిల్లా కృషి విజ్ఞాన కేంద్రం (కేవీకే) శాస్త్రవేత్తలు, వ్యవసాయ శాఖ అధికారులు సూచించారు. మండలంలోని సోంపల్లి గ్రామ పంచాయతీ పరిధిలో ఆదర్శ రైతు గాదె నర్సిరెడ్డి పొలంలో పచ్చిరొట్ట ఎరువులను కలియదున్నే కార్యక్రమంలో పాల్గొన్న అధికారులు అనంతరం రైతులకు అవగాహన సదస్సు నిర్వహించారు.

ఈ సందర్భంగా వారు మాట్లాడుతూ, పచ్చిరొట్ట ఎరువులను నేలలో కలియదున్నడం వల్ల సేంద్రీయ కర్బనం పెరిగి నేల సారవంతం కావడంతో పాటు అధిక దిగుబడులు సాధించవచ్చని తెలిపారు. ఎల్ నినో ప్రభావంతో ఈ ఏడాది లోటు వర్షపాతం నమోదయ్యే అవకాశం ఉందని, ప్రాజెక్టుల్లో నీటి నిల్వలు కూడా తక్కువగా ఉండే పరిస్థితులు కనిపిస్తున్నాయని పేర్కొన్నారు. దీంతో వరి వంటి అధిక నీటి అవసరమున్న పంటల కంటే కంది, పెసర, బొబ్బర్లు వంటి స్వల్పకాలిక పంటలను సాగు చేయాలని రైతులకు సూచించారు.