-ప్రపంచ అందాల పోటీలో ప్రపంచానికి శాంతి, ఐక్యత సందేశం 

-కట్టుదిట్టమైన భద్రతా ఏర్పాట్లు చేసిన రాష్ట్ర ప్రభుత్వం 

హైదరాబాద్, మే 10 (విజయక్రాంతి): హైదరాబాద్ నగరం దేశంలోనే అత్యంత సురక్షితమైన, ఆకర్షనీయమైన నగరమని మరోసారి చాటుకుంది. శాంతి భద్రతలకు సురక్షితమైన నగరంగా మరోసారి తన స్థానాన్ని పదిలపరుచుకుంది.

ఇండియా మధ్య అలుముకున్న యుద్ధ వాతావరణంలో శనివారం హైదరాబాద్‌లో ప్రపంచ అందాల పోటీల ప్రారంభోత్సవం అత్యంత వైభవంగా, ప్రశాంతంగా జరిగాయి. తెలంగాణ బ్రాండ్ ఇమేజీని ఈ వేడుకలు మరోసారి ప్రపంచానికి చాటి చెప్పాయి. ప్రపంచ శాంతికి, ఐక్యతకు అందాల పోటీలు కూడా పాటుపడతాయని నిర్వాహకులు ప్రకటించారు.

110 దేశాల నుంచి వచ్చిన  అందాల తారలతో పాటు, విదేశీ అతిథులకు తెలంగాణ ప్రభుత్వం మంచి ఆతిథ్యంతో పాటు, అత్యంత కట్టుదిట్టమైన భద్రతా ఏర్పాట్లు కల్పించింది.  ప్రపంచమంతా ఈ ప్రారంభోత్సవ వేడుకలను ఆసక్తిగా తిలకించింది.

దాదాపు వెయ్యి మందికిపైగా వివిధ దేశాలకు చెందిన జాతీయ అంతర్జాతీయ మీడియా ప్రతినిధులు ఈ ఈవెంట్‌ను ప్రసారం చేశారు. ఇక్కడి సంస్కృతి సంప్రదాయాలతో పాటు భౌగోళికంగా, నైసర్గికంగా హైదరాబాద్‌లో ఉన్న పర్యావరణం విదేశీ అతిథులను అమితంగా ఆకట్టుకుంది. తెలంగాణ సంస్కృతి సంప్రదాయాలకు తోడు పాశ్చాత్య దేశాల కల్చర్ మేలవింపుగా కార్యక్రమం కొనసాగింది.