శారీరక విద్య ఉపాధ్యాయులు నిర్ధిష్ట గ్రేడ్ స్థాయి విద్యార్థులకు శారీరక విద్య సూత్రాల గురించి బోధిస్తారు. వారు ప్రాథమిక, మాధ్యమిక లేదా ఉన్నత పాఠశాలలో విభిన్న శారీరక సామర్థ్యం కలిగిన విద్యార్థులతో పనిచేస్తారు. పిల్లలకు వ్యాయామం ఎందుకు ముఖ్యమో, సాధారణ క్రీడలను ఎలా ఆడాలో ఫిట్‌నెస్‌ను మెరుగు పరచగల, ఆరోగ్యకరమైన మెదడు కార్యకలాపాలను ప్రేరేపించగల నిర్ధ్దిష్ట శారీరక కార్యకలాపాలను ఎలా నిర్వహించాలో బోధిస్తారు. ఫిజికల్ ఎడ్యుకేషన్  ఉపాధ్యాయులు తరచుగా తరగతి గదిలో సంబంధిత పాఠాలను కూడా బోధించవచ్చు. ఆరోగ్యకరమైన ఆహారాన్ని ఎలా అనుసరించాలి? వ్యాయామం శరీరాన్ని ఎలా ప్రభావితం చేస్తుంది? అనే అంశాలు బోధించాల్సి ఉంటుంది.

వ్యాయామ  ఉపాధ్యాయులు పాఠ్య ప్రణాళికలు రూపొందిస్తారు. పాఠశాల తర్వాత క్రీడా కార్యకలాపాలకు నాయకత్వం వహిస్తారు. గతంలో ఫిజికల్ ఎడ్యుకేషన్ టీచర్ రిక్రూట్‌మెంట్‌లో గరిష్ఠంగా 100 మార్కులకు 70 థియరీకి, 30 ప్రాక్టికల్స్‌కు ఉండేవి.  ఇప్పుడు వంద మార్కులు థియరీ, అందులో  డిస్క్రిప్టివ్ కాకుండా కేవలం అబ్జెక్టివ్ ఎంపిక విధానం ఉంది. అంటే ఎవరైనా ఏ, బీ, సీ, డీలు తెలిస్తే చాలు ఎగ్జామ్ రాసేసి అదృష్టాన్ని పరీక్షించుకోవచ్చు.

ఈ విధానం విభిన్న పోటీలలో, అథ్లెట్స్, క్రీడా, ఇండోర్ అవుట్ డోర్ గేమ్స్‌లో రాష్ట్ర స్థాయి, జాతీయ స్థాయి,  అంతర్జాతీయ స్థాయిలో ప్రతిభ కనబరిచిన వారికి శరాఘాతంగా మారింది. జాతీయ సేవా సంస్థ, ఎన్సీసీలో వివిధ కార్యక్రమాల్లో పాల్గొని సర్టిఫికెట్లు తెచ్చుకున్న వారి ప్రతిభ పాతరేసినట్లుగానే ఉంటున్నది. వ్యాయామ ఉపాధ్యాయులకు  అవసరమైన 9 లక్షణాలు (అథ్లెటిక్, బోధనా సామర్థ్యాలు, రాతపూర్వక, మౌఖిక కమ్యూనికేషన్, వ్యక్తులమధ్య నైపుణ్యాలు, ఓర్పు, నైపుణ్యం వంటివి) ఉండాలి. అథ్లెటిక్ సామర్థ్యం ఒక ముఖ్య లక్షణం. ఎందుకంటే, వారు తరచుగా పిల్లలకు వ్యాయామాలు ఎలా చేయాలో చూపిస్తారు. సరైన రూపాన్ని ప్రదర్శించడానికి పిల్లలు వారి ఫిట్‌నెస్ విద్యను కొనసాగించమని ప్రోత్సహించడానికి, వారు స్వయంగా వ్యాయామాలను చేయగలగడం తప్పనిసరి.

ఫిజికల్ ఎడ్యుకేషన్ ఉపాధ్యాయులు పాఠశాల అధ్యాపక బృందంలో సభ్యులు. కాబట్టి, వారు విద్యార్థులకు పాఠాలు కమ్యునికేట్ చేయడానికి అనుమతించే బోధనా సామర్థ్యాన్ని కలిగి ఉండటం చాలా అవసరం. వ్యక్తులమధ్య నైపుణ్యాలు ఫిజికల్ ఎడ్యుకేషన్‌లో అంతర్భాగం. కోచ్‌లు అధ్యాపక బృందాలలో భాగం కనుక, ఇతర ఉపాధ్యాయులతో కలిసి పని చేయాలి. వారు తరచుగా విద్యార్థుల సాధారణ విద్య ఉపాధ్యాయులతో కలిసి, తలెత్తే ఏదైనా ప్రవర్తనా సమస్యలు పరిష్కరించడానికీ సహకరిస్తారు. విద్యార్థుల కోసం ఫీల్డ్ డేస్, ప్రత్యేక ఫీల్డ్ ట్రిప్స్ వంటి కార్యకలాపాలను ప్లాన్ చేస్తారు. విద్యార్థులకు భావోద్వేగ నైపుణ్యాలను కూడా రూపొందించవచ్చు. పిల్లలతో పని చేయడానికి ఓర్పు, అనుకూలత అవసరం. కాబట్టి, శారీరక విద్య ఉపాధ్యాయుడంటే  కేవలం పుస్తకాలు తిరగేసిన వారు కాదు, పుస్తక  జ్ఞానంతోపాటు వ్యాయామ జ్ఞానం, ప్రాక్టికల్ నాలెడ్జి అవసరమవుతాయి. కనుక, కొత్త పరీక్ష విధానం రద్దు చేసి, పాత విధానం నిర్వహించాలి. 

 -డా.  యు.శివయ్య