తగ్గేదే లే!

85 ఏళ్ల వయసులో ఫ్యాషన్ ప్రియులకు ఐకానిక్ స్టార్‌గా మారిందీ బామ్మ.. ఒక్కసారిగా గ్లోబల్ స్టార్‌గా ఎదిగిపోయింది. అందానికి ఈ బామ్మ కొత్త ముచ్చట చెబుతుంది. మనసుకు వయసుతో సంబంధం లేదని నిరూపించింది. అరవై ఏళ్లు వచ్చాయంటే.. కృష్ణా.. రామా.. అంటూ ఏదో ఓ మూలన చేరి శేష జీవితాన్ని గడిపేస్తుంటారు వృద్ధులు. అయితే ఓ 85 ఏళ్ల బామ్మ మాత్రం నాకేమంత వయసైపోయింది? అంటూ లేడి పిల్లల మారిపోయింది.అంతేనా.. సినిమా హీరోయిన్లకు దీటుగా.. ఫ్యాషన్ ఐకాన్‌గా మారిపోతుంది. ఈ బామ్మ స్టయిల్ చూస్తే వందేళ్లు వచ్చినా ఏ మాత్రం తగ్గకూడదు.. అనిపించేస్తుంది.   

జాంబియాకు చెందిన మార్గరెట్ చోలా.. అనే 85 ఏళ్ల వృద్ధురాలు ఊహించని రీతిలో గ్లోబల్ ఫ్యాషన్ ఐకాన్‌గా మారింది. తన ఇన్‌స్టాగ్రామ్ ఖాతా చూస్తే.. వామ్మో అనేస్తారు. ‘లెజెండరీ గ్లామా’ హ్యాష్ ట్యాగ్‌తో ప్రతి రోజూ రకరకాల ఫ్యాషనబుల్ వస్త్రాధారణతో చమటలు పట్టించేస్తుంది. మార్గరెట్ చోలా బామ్మకు 1,05000 మంది ఫాలోవర్లు ఉన్నారంటే ఆమె క్రేజ్ ఏ స్థాయిలో ఉందో ఊహించుకోవచ్చు. ఫేమస్ సన్ గ్లాసెస్ నుంచి రకరకాల ఆభరణాల వరకు లెటెస్ట్ స్టయిల్‌లో దుస్తులను ధరించి.. ఫొటోలకు ఫోజులిస్తుంది.

అయితే అలా దిగిన ఫొటోలను తన ఇన్‌స్టాగ్రామ్ ఖాతాలో షేర్ చేయడం బామ్మ దినచర్య. ఆమె సృజనాత్మక ఆలోచనను న్యూయార్క్‌లో ఉంటున్న ఆమె మనవరాలు డయానా కౌంబా ఎమ్.ఎస్ చోల ‘గ్రానీ సిరీస్’ పేరిట వెబ్ సిరీస్ తీసింది. దీంతో బామ్మ డ్రెస్ ఆప్ సెషన్‌లు ప్రపంచవ్యాప్తంగా ఫేమస్ అయ్యాయి.