మిరిక్‌లో కొండచరియలు విరిగిపడి ఆరుగురు మృతి

కోల్‌కతా: భారీ వర్షాల కారణంగా పశ్చిమ బెంగాల్‌లోని డార్జిలింగ్ జిల్లాలో మిరిక్‌లో కొండచరియలు విరిగిపడి ఆరుగురు మరణించారు. ఈ ఘటన మిరిక్‌లోని జస్బీర్ బస్తీలో చోటు చేసుకుంది. మిరిక్, కుర్సియాంగ్ జిల్లాలోని పట్టణాలు, పర్యాటక ప్రదేశాలను కలిపే దుడియా ఐరన్ వంతెన కూలిపోయింది. కుర్సియాంగ్ సమీపంలోని జాతీయ రహదారి 110 వెంబడి ఉన్న హుస్సేన్ ఖోలా నుండి భారీ వర్షాల కారణంగా కొండచరియలు విరిగిపడిన విషయం తెలిసిందే. కొండచరియలు విరిగిపడి గ్రామాల నుండి జాతీయ రహదారుల వరకు రోడ్లు బురదలో మునిగిపోయిన దృశ్యాలు సోషల్ మీడియాలో వైరల్ అవుతున్నాయి.

డార్జిలింగ్, కాలింపాంగ్, కూచ్ బెహార్, జల్పైగురి, అలీపుర్దువార్‌లలో ఆదివారం ఉదయం వరకు అతి భారీ వర్షాలు కురుస్తాయని వాతావరణ శాఖ అంచనా వేయడంతో ఈ ప్రాంతం రెడ్ అలర్ట్‌లో ఉంది. బంగాళాఖాతంలో ఏర్పడిన వాయుగుండం తీరందాటడంతో సోమవారం ఉదయం వరకు ఉప-హిమాలయ పశ్చిమ బెంగాల్‌లో భారీ నుండి అతి భారీ వర్షపాతం కురిపిస్తుందని భారత వాతావరణ శాఖ హెచ్చరించింది. ఉత్తర బెంగాల్‌లోని డార్జిలింగ్ పొరుగు జిల్లా అలీపుర్దువార్‌లో సోమవారం ఉదయం వరకు భారీ వర్షం కొనసాగుతుందని ఐఎండీ పేర్కొంది.

కొండ జిల్లాల్లో రాత్రంతా ఎడతెరిపి లేకుండా కురుస్తున్న వర్షాల కారణంగా, పొరుగు జిల్లా జల్పైగురిలోని మల్బజార్‌లోని ఒక ప్రాంతం నీటిలో మునిగిపోయింది. తీస్తా, మాల్ ఇతర కొండ నదుల నీటి మట్టాలు ప్రమాద స్థాయిని మించి ప్రవహిస్తున్నాయని, దీనివల్ల వరద లాంటి పరిస్థితి ఏర్పడుతుంది. సోమవారం ఉదయం వరకు ఈ జిల్లాల్లో చాలా చోట్ల తేలికపాటి నుండి మోస్తరు వర్షాలు కురిసే అవకాశం ఉందని ఐఎండీ వెల్లడించింది.