వేసవిలో తాగునీటి సరఫరాపై ప్రత్యేక దృష్టి సారించాలి

కలెక్టర్ తేజస్ నందలాల్ పవర్

నూతనకల్, మార్చి 25: ఎండలు ముదురుతున్న నేపథ్యంలో వేసవికాలంలో ప్రజలకు తాగునీటి ఇబ్బందులు కలగకుండా అధికారులు ప్రత్యేక దృష్టి సారించాలని జిల్లా కలెక్టర్ తేజస్ నందలాల్ పవర్ ఆదేశించారు. బుధవారం మండల పరిధిలోని శిల్పకుంట్ల గ్రామంలో ఉన్న మిషన్ భగీరథ ప్లాంటును ఆయన ఆకస్మికంగా సందర్శించారు. ఈ సందర్భంగా కలెక్టర్ పాలేరు నుండి వస్తున్న నీటి సరఫరా తీరును నిశితంగా పరిశీలించారు. ప్లాంటుకు అందుతున్న నీటి పరిమాణం, సరఫరా అవుతున్న విధానంపై అధికారులను అడిగి తెలుసుకున్నారు.

అనంతరం ప్లాంటులోని ల్యాబ్ను సందర్శించి, నీటి నాణ్యతను ఎలా నిర్ధారిస్తున్నారో ప్రత్యక్షంగా పర్యవేక్షించారు.ప్లాంటులో నిర్వహిస్తున్న రికార్డులను తనిఖీ చేసి, క్షేత్రస్థాయిలో నీటి సరఫరాలో ఎలాంటి జాప్యం జరగకుండా చూడాలని అధికారులకు సూచించారు.అనంతరం కలెక్టర్ గ్రామంలోని ఇందిరమ్మ ఇళ్లను పరిశీలించారు. ఈ సందర్భంగా ఆయన మాట్లాడుతూ  లబ్ధిదారులు ప్రభుత్వం నిర్దేశించిన మార్గదర్శకాలకు అనుగుణంగా నిర్మాణాలు చేపట్టి , ఇళ్ల నిర్మాణాలను త్వరితగతిన పూర్తి చేసుకోవాలన్నారు.