అమ్మ జాతీయ జెండాను ముద్దాడింది

మళ్లీ వస్తానమ్మ అని అమ్మకు 

మాటిచ్చి వెళ్ళాడు!

కొన్నాళ్ళ తర్వాత ఓ మూటలో 

ముద్దలా వచ్చాడు ఇంటికి!

మన త్రివర్ణ పతాకాన్ని గట్టిగా కౌగిలించుకుని 

కార్గిల్ పోరాటపు సగర్వంతో కన్ను మూశాడు..!

అమ్మకిచ్చిన మాట తప్పాడు

తన తండ్రి దున్నే పొలంలో మట్టై మిగిలాడు..!!

ఇంత వేదనలో కూడా ఆ తల్లి కంటిలో 

వెలుగునే చూశారు ఆ జనం..!

మరో భగత్‌సింగ్ నా కొడుకంటూ

ఆ తల్లి గుండెలు బాదుకుంటుంటే 

భరతమాత నిశ్శబ్దంగా యుద్ధం చేస్తుంది 

భావితరపు అందమైన భవిష్యత్ కోసం..!!

ఊరు ఊరంతా నా జాతీయ జెండాలతో 

వందేమాతరపు ప్రతిధ్వనులతో 

గట్టిగానే గర్జిస్తున్నారు

సరిహద్దులోని సైనికులారా మీకు 

మేమున్నామని..

వాళ్ళందరికీ వినిపించాలని..!!

ఆ రోజు వేలాది ఉద్వేగాల ఊపిరి 

శ్వాస శబ్దాల మధ్య ఆ దేశ రక్షకుడు 

మన జనగణమన గీతంలో 

అక్షరమై మిగిలిపోయాడు..!

మళ్ళీ మరో ఉదయం..

మరో ఉద్యమం కోసం..

పొలంలో ఓ చిన్న మొక్క మొలిచింది..!!

యుద్ధమేదైనా .. ప్రత్యర్థి ఎంతటి వారైనా 

దేశం అంటే మాత్రం ఓ యోధుడిలా..

ప్రకాశించమని..ప్రాణాలివ్వమని  

ఆ మొక్క ఏదో పాఠం చెబుతుంది..!!

అది అర్థం చేసుకున్న ఆ అమ్మ..

మళ్లీ ఓసారి మన జాతీయ 

జెండాను ముద్దాడింది..!!

తన కొడుకు మరో భగత్‌సింగ్ అనే గర్వంతో..!

వరదలా వస్తున్న తన కన్నీళ్లను ఆపుకోలేక..!!

ఫిజిక్స్ అరుణ్ కుమార్

సెల్: 9394749536