ముంబైలో ఇద్దరిని పట్టుకున్న సిటీ సైబర్ కాప్స్

హైదరాబాద్ వాసికి రూ. 12.30 లక్షల కుచ్చుటోపీ 

హైదరాబాద్ సైబర్ క్రైమ్స్ డీసీపీ దార కవిత

హైదరాబాద్, సిటీ బ్యూరో నవంబర్ 29 (విజయక్రాంతి) :  ట్రేడింగ్ పేరుతో మోసాలకు పాల్పడుతున్న ఓ అంతర్రాష్ర్ట ముఠా గుట్టును హైదరాబాద్ సైబర్ క్రైమ్ పోలీసులు రట్టు చేశారు. అదే సమయంలో నగరంలో కలకలం రేపుతున్న డిజిటల్ అరెస్ట్ స్కామ్‌లపై ప్రజలను అప్రమత్తం చేస్తూ కీలక హెచ్చరికలు జారీ చేశారు. స్టాక్ మార్కెట్ ట్రేడింగ్ పేరుతో అమాయకులను మోసం చేస్తున్న ముఠాలోని ఇద్దరు కీలక నిందితులను హైదరాబాద్ సైబర్ క్రైమ్ పోలీసులు ముంబైలో అరెస్ట్ చేశారు.

వీరిలో ప్రధాన నిందితుడు రవికుమార్ కాగా, మరొకరు మ్యూల్ బ్యాంక్ అకౌంట్లు సమకూరుస్తున్న శివేంద్ర అశోక్ సింగ్. వీరు హైదరాబాద్‌కు చెందిన ఓ వ్యక్తికి ట్రేడింగ్‌లో భారీ లాభాలు వస్తాయని నమ్మించి రూ. 12.30 లక్షలు కాజేశారు. బాధితుడి ఫిర్యాదుతో రంగంలోకి దిగిన పోలీసులు.. నిందితులను ట్రేస్ చేశారు. వీరిపై దేశవ్యాప్తంగా ఇప్పటికే 12 కేసులు నమోదైనట్లు గుర్తించారు.

నగరంలో ‘డిజిటల్ అరెస్ట్’ స్కామ్‌లు పెరుగుతుండటంతో హైదరాబాద్ సైబర్ క్రైమ్స్ డీసీపీ దార కవిత ప్రత్యేక అడ్వుజరీ జారీ చేశారు. కొందరు నకిలీ పోలీసులు, సీబీఐ, ఈడీ, కస్టమ్స్, నార్కోటిక్స్ అధికారులమని చెప్పుకుంటూ.. వీడియో కాల్స్ చేసి జనాన్ని భయపెడుతున్నారని తెలిపారు. పోలీసులు వీడియో కాల్స్ చేసి విచారణ చేయరని, ప్రజలు అప్నమత్తంగా ఉండాలని సూచించారు.