ఈ వస్తువులు గుర్తున్నాయా? 

ఇల్లు మారిన ప్రతిసారీ కొంత పాత సామాను తూకానికి వెళ్లిపోతుంది. కొత్త ఎలక్ట్రా నిక్ వస్తువు కొన్నప్పుడుల్లా ఏదో ఓ వస్తువు ట్రంకుపెట్టెను ఆశ్రయిస్తుంది. కొత్త నీరు వచ్చి పాత నీటిని తరిమేయడం లాంటి వ్యవహారమే ఇది. అలా అటకెక్కిన సామగ్రిలో.. ప్రతి ఇత్తడి బిందె నొక్కుల వెనుకా, ప్రతి స్టీలు క్యారేజీ సొట్టల వెనుకా, ప్రతి రాగి గిన్నె మీద చెక్కిన పేరు వెనుకా.. ఓ నోస్టాల్జియా ఉంటుంది. అందులో కొన్ని జేజమ్మ నుంచి నానమ్మకు, నానమ్మ నుంచి అమ్మకు, అమ్మ నుంచి శ్రీమతికి వారసత్వంగా అందినవీ ఉంటాయి. వాటిని వెలకట్టలేం. తూకానికేసి చిన్నబుచ్చలేం. 

కావిడి పెట్టె..

పాతకాలంలో ఆడపిల్ల అత్తవారి ఇంటికి వెళ్తుంటే ఆమె వస్తువులు, బట్టలు అన్నీ ఇందులో సద్దుకుని పట్టుకెళ్లేది. దీన్ని కావడిలో వేసి పట్టుకెళ్లేవారు. సారితో సహా. సారి కావిళ్ల మీద పట్టుకెళ్లేవారు. అందుకే సారి కావిళ్లని పేరు వచ్చింది. ఈ పెట్టెను టేకుతో తయారు చేస్తారు. ఈ పెట్టెను కనక రంగం పెట్టె, రంగూన్ పెట్టె అని కూడా పిలుస్తారు. ఇప్పటికీ పల్లెల్లో అక్కడక్కడ దర్శనమిస్తుంది. ఈ పెట్టె మధ్యలో చిన్న చిన్న అరలు ఉంటాయి.