కోదాడ: మండల పరిధిలోని నల్లబండగూడెం గ్రామం రామాపురం క్రాస్ రోడ్డులో ఈ నెల 25, 26 తేదీల్లో జరిగే నాగుల చవితి మహోత్సవాలకు సుబ్రహ్మణ్యేశ్వర స్వామి(పుట్ట) దేవాలయాన్ని నిర్వాహకులు ముస్తాబు చేశారు. ఈనెల 25, 26వ తేదీ శని, ఆదివారాలలో నాగుల చవితి మహోత్సవాలు నిర్వహిస్తున్నారు. శనివారం ఉదయం స్వామివారికి అభిషేకాలు, ముళ్లపాడు శ్రీ సీతారామాంజనేయ భక్తబృందం వారిచే 108 సార్లు హనుమాన్ చాలీసా పారాయణం, భక్తులకు అన్నదాన కార్యక్రమం నిర్వహిస్తారు.

అదేవిధంగా ఆదివారం నాగపంచమి పురస్కరించుకొని ఉదయం స్వామివారికి అభిషేకాలు, హోమాది కార్యక్రమాలు నిర్వహిస్తారు. మాలధారణ స్వాములకు ప్రత్యేకంగా సద్ది ఏర్పాటు చేశారు. నాగుల చవితి పండుగ సందర్భంగా చుట్టుపక్కల గ్రామవాసులు పెద్ద ఎత్తున పాల్గొంటారు. భక్తులు పాల్గొని తమ మొక్కులను చెల్లించుకోవాలని నిర్వాహకులు కోరారు.