కల్లూరు (విజయక్రాంతి): మండల పరిధిలో కప్పల బంధం రోడ్డులో గల చిలం శెట్టి ధనలక్ష్మి-కిరణ్ కుమార్ దంపతుల ఇంటి అవర్ణలో ఆరు సంవత్సరాల నుండి ప్రతి మే నెలలో ఈ పుష్పం వికసిస్తుందని తెలిపారు. పుట్ బాల్ లిల్లీ లేదా బ్లడ్ లిల్లీ చూడ్డానికి ఎర్రని బంతిలా, ఆకట్టుకొనేలా ఉంటుంది. దీనినే స్థానికంగా భారతదేశంలో మే పుష్పం అంటారు. ఎండలు విపరీతంగా ఉన్నప్పుడు అంటే ఏప్రిల్, మే నెలల్లో పూస్తుంది కనుకనే దీనిని మే పుష్పం అంటారు. ఇది లిల్లీ జాతికి చెందిన దుంప రకం మొక్క. ఒక్క సారి నేలలో పాతితే అది చనిపోవడం అంటూ ఉండదు. నెమ్మదిగా పిలకలు వేస్తూ విస్తరిస్తూనే ఉంటుంది. ఎంత వేడిగా ఉంటే అంతగా ఇది పూలతో వికసిస్తుంది. 

మొగ్గ పువ్వుగా విచ్చుకోవడానికి సుమారు ఇరవై రోజులు పడుతుంది. ఒకటిన్నర నుంచి రెండడుగుల ఎత్తు ఉండే ఈ మొక్క తక్కిన కాలం అంతా పచ్చని వెడల్పాటి ఆకులతో అలరిస్తుంది. అందుకే దీనిని ల్యాండ్ స్కేపుల్లో అంచులకు వాడతారు. దీనిని బొకేల్లో వాడరు. కానీ కట్ ప్లవర్ మాదిరిగా ప్లవర్ వాజ్ లో పెట్టుకోవడానికి చాలా బాగుంటుంది. కాకపోతే ఒక దుంపకి ఒక పువ్వే పూస్తుంది. ఎక్కువ పూలు కావాలంటే అన్ని దుంపలు నాటుకోవాల్సిందే. దీనికుండే మరో ప్రత్యేకత మన ఇంట్లో దుంపలు ఎంత పాతవయితే పువ్వు పరిమాణం పెరుగుతూ వస్తుంది. అంటే మొదటి ఏడాది చిన్న బంతిలా పూస్తే రెండు మూడేళ్ల తర్వాత పెద్ద పెద్ద పూలతో వికసిస్తుంది. ఏటికేడాది దీని పరిమాణం పెరుగుతుంది. ఇసుక నేలల్లో బాగా పెరుగుతుంది. రోజులో ఎండ నాలుగు గంటలు పాటు ఉండాలి. కట్ ప్లవర్ గా అలంకరించుకొంటే పొడవాటి ప్లవర్ వాజులని వాడాలి అని తెలిపారు.