మీరట్: ఉత్తరప్రదేశ్‌లోని మీరట్‌లో(Meerut) నాటు సారా సేవించిన తర్వాత ముగ్గురు వ్యక్తులు అనుమానాస్పద పరిస్థితుల్లో మరణించారు. ఆ సారా నాణ్యత లోపం వల్లే వారు మరణించారా అనేది ప్రాథమిక విచారణలో ఇంకా నిర్ధారణ కాలేదని అధికారులు శనివారం తెలిపారు. శుక్రవారం సాయంత్రం మద్యం సేవించిన తర్వాత ఆ ముగ్గురూ వాంతులు చేసుకుని, కడుపు నొప్పితో బాధపడ్డారు. వెంటనే వారిని ఆసుపత్రికి తరలించగా, అక్కడ చికిత్స పొందుతూ వారు మృతి చెందినట్లు వైద్యులు ప్రకటించారు.

మరణానికి గల ఖచ్చితమైన కారణం పోస్టుమార్టం ద్వారా తెలుస్తుందని తెలిపారు. పోలీసుల ప్రకారం, కిరాణా దుకాణం యజమాని బాబురామ్ (60), అతని దుకాణంలో పనిచేసే జితేంద్ర (35), అంకిత్ అలియాస్ దౌలత్ (40) సాయంత్రం వేళ ప్రభుత్వ అనుమతి కలిగిన నాటు సారా విక్రయ కేంద్రం నుండి మద్యం కొనుగోలు చేసి, అక్కడే మద్యం సేవించడం ప్రారంభించారు. ఈ ఘటనపై కేసు నమోదు చేసుకున్న పోలీసులు దర్యాప్తు చేస్తున్నారు.