1. తెలంగాణ ఏర్పాటును సాధ్యం చేసిన ఘనచరిత్ర ఆయనది
   

కేసీఆర్ దీక్ష ఉద్యమ గతిని మలుపు తిప్పింది

ప్రాణ త్యాగానికి సైతం సిద్ధమైన ధీరత్వం కేసీఆర్‌ది

త్యాగాల వల్లే తెలంగాణ ఆవిర్భావం

దీక్షా దివస్ సందర్భంగా మాజీ మంత్రి హరీశ్‌రావు ట్వీట్

హైదరాబాద్/సిద్దిపేట, నవంబర్ 29 (విజయక్రాంతి) : తెలంగాణ అజరామర చరిత్రకు వీరోచిత సంతకం కేసీఆర్, నాలుగు కోట్ల ప్రజల్లో మార్మోగే ‘జై తెలంగాణ’ అనే రణ నినాదం కేసీఆర్ అని మాజీ మంత్రి హరీశ్‌రావు తెలిపారు. రానే రాదు, కానే కాదు అన్న ప్రత్యేక రాష్ట్ర ఏర్పాటును సబ్బండ వర్గాలను ఏకం చేసి సుసాధ్యం చేసి చూపిన ఘన చరిత్ర కేసీఆర్‌ది అని కొనియాడారు.

దీక్షా దివస్ సందర్భంగా హరీశ్‌రావు శనివారం ట్విట్టర్ వేదికగా స్పం దించారు. ‘తెలంగాణ వచ్చుడో.. కేసీఆర్ సచ్చుడో’ నినాదంతో 2009 నవంబర్ 29న కేసీఆర్ ప్రారంభించిన ఆమరణ దీక్ష, ఉద్యమ గతిని మలుపు తిప్పిందని తెలిపారు. సరికొత్త చరిత్రకు నాంది పలికి, తెలంగాణ ఏర్పాటుకు బాటలు వేసిందని పేర్కొన్నారు. నాలుగు కోట్ల ప్రజల ఆకాంక్ష సాధనకు అలుపెరగని పోరాటం చేసిన చరిత్ర కేసీఆర్‌ది అని గుర్తు చేశారు.

పదవులే కాదు, తెలంగాణ కోసం ప్రాణ త్యాగం చేసేందుకు సిద్ధమైన ధీరత్వం కేసీఆర్‌దని కొనియాడారు. నవంబర్ 29న కేసీఆర్ దీక్ష లేకుండా డిసెంబర్ 9న ప్రకటన లేదని, డిసెంబర్ 9న ప్రకటన లేకుండా తెలంగాణ రాష్ట్రమూ లేదని స్పష్టం చేశారు. దశాబ్దాల పోరాటంతోనే తెలంగాణ సిద్ధించిందే తప్ప పాలకుల దయాదాక్షిణ్యాలతో కాదన్నది అక్షర సత్యమని వెల్లడించారు. తెలంగాణ రాష్ట్ర ఏర్పాటుకు కారణమైన కేసీఆర్ దీక్షాకాలం ఉద్యమ జ్ఞాపకాలు తన గుండెలో పదిలంగా ఉన్నాయని, జై తెలంగాణ అని నినదిస్తున్నాయని, తెలంగాణ స్ఫూర్తిని నిత్యం రగిలిస్తున్నాయని తెలిపారు. 

ఉద్యమాన్ని కాంగ్రెస్ వక్రీకరిస్తుంది : హరీశ్ రావు

ప్రజాస్వామ్య ఉద్యమం, తెలంగాణ ఆవిర్భావం, కేసీఆర్ దీక్షతో జరిగిన చారిత్రక పరిణామాలను స్మరించుకోవాల్సిన అవసరం ఉందని, తెలంగాణ రాష్ట్రం ఉన్నంత కాలం కేసీఆర్ చరిత్రనే ఉంటుందని మాజీ మంత్రి, సిద్దిపేట ఎమ్మెల్యే హరీశ్‌రావు అన్నారు. సిద్దిపేట అర్బన్ మండలం పొన్నాలలోని బీఆర్‌ఎస్ పార్టీ జిల్లా కార్యాలయం లో దీక్ష దివస్ కార్యక్రమాన్ని శనివారం నిర్వహించారు.

ఈ సందర్భంగా హరీశ్‌రావు మాట్లాడుతూ నవంబర్ 29 అంటే ఒక చరిత్ర అని పేర్కొంటూ, తెలంగాణ ఉద్యమానికి సిద్దిపేటకు అవినాభావ సంబంధం ఉందన్నారు. తెలంగాణ రాష్ట్రం ఎంతోమం ది త్యాగాల ఫలితమని, కేసీఆర్ నాయకత్వమే అందరి మనోధైర్యానికి కారణమని తెలిపారు. కాంగ్రెస్ నాయకులు తెలంగాణ ఉద్యమ చరిత్రను వక్రీకరించేందుకు ప్రయత్నిస్తున్నారని వ్యాఖ్యానించారు.

దీక్ష చేసింది బీఆర్‌ఎస్ నాయకులు, కానీ కక్షలు కాంగ్రెస్ వాళ్లవి అంటూ విమర్శలు గుప్పించారు. తెలంగాణ ఉద్యమ ద్రోహి రేవంత్ రెడ్డికి కోదండరాం దగ్గరయ్యాడని ఆరోపించారు. కృష్ణా నది నీళ్ల విషయంలో ఆంధ్రప్రదేశ్ ట్రిబ్యునల్ తెలంగాణకు వ్యతిరేకంగా వాదిస్తుండగా, తెలంగాణ కాంగ్రెస్ నేతలు నోరు మెదపరని హరీశ్ ఆరోపించారు. మూడు కోట్ల తెలంగాణ ప్రజల ఆత్మగౌరవాన్ని కించపరచకండని ఆయన హెచ్చరించారు. కార్యక్రమంలో దుబ్బాక ఎమ్మెల్యే, పార్టీ జిల్లా అధ్యక్షుడు కొత్త ప్రభాకర్ రెడ్డి, ఎమ్మెల్సీలు దేశపతి శ్రీనివాస్, యాదవ రెడ్డి, పార్టీ శ్రేణులు పాల్గొన్నారు.