ఎంబీయులో అర్హులైన విద్యార్థులకు 100% ట్యూషన్ ఫీజు రాయితీ

తిరుపతి, 24 ఆగస్టు 2026: దేశంలోని అతిపెద్ద బహుళ విద్యా విభాగాల విశ్వవిద్యాలయాల్లో ఒకటైన మోహన్ బాబు యూనివర్సిటీ (ఎంబీయు), నాణ్యమైన ఉన్నత విద్యను అందరికీ మరింత చేరువ చేయాలనే తన నిబద్ధతను బలోపేతం చేస్తూ 2026-27 విద్యా సంవత్సరానికి గాను సమగ్ర ఉపకారవేతన విధానాన్ని ప్రకటించింది. విద్యాపరమైన ప్రతిభను గుర్తించడంతో పాటు విభిన్న నేపథ్యాల నుంచి వచ్చిన విద్యార్థులకు అవకాశాలు కల్పిస్తూ, ఈ విధానం ద్వారా మెరిట్-ఆధారిత, అవసరాల-ఆధారిత, కమ్యూనిటీ మెరిట్ మరియు ప్రతిభ-ఆధారిత విభాగాల్లో స్కాలర్‌షిప్‌లను అందిస్తోంది.

ఈ స్కాలర్‌షిప్ విధానం కింద కుటుంబంలో ఏకైక సంతానమైన బాలికలు, మాజీ సైనికోద్యోగులు మరియు భారత సాయుధ దళాల సిబ్బంది పిల్లలు, విశ్వవిద్యాలయానికి 50 కిలోమీటర్ల పరిధిలోని గ్రామీణ ప్రాంతాలకు చెందిన విద్యార్థులు, పూర్వ విద్యార్థులు, అలాగే రాయలసీమ ప్రాంతానికి చెందిన మొదటి తరం పట్టభద్రులు వంటి వివిధ వర్గాలను చేర్చారు. ఈ సదుపాయాల ద్వారా, విద్యార్థుల అకడమిక్ సామర్థ్యంతో పాటు వారి వ్యక్తిగత పరిస్థితులు, విజయాలను గుర్తిస్తూ వారికి అండగా నిలవాలని ఎంబీయు భావిస్తోంది.

ప్రతిభ-ఆధారిత స్కాలర్‌షిప్ ప్రోగ్రామ్ ద్వారా అసాధారణమైన క్రీడా నైపుణ్యాన్ని కూడా ఈ విశ్వవిద్యాలయం గుర్తిస్తుంది. ఒలింపిక్స్, కామన్వెల్త్, ఆసియా లేదా దక్షిణాసియా క్రీడలలో పతకాలు సాధించిన విద్యార్థులు 100% స్కాలర్‌షిప్‌కు అర్హులు కాగా, జాతీయ స్థాయి క్రీడల్లో ప్రతిభ కనబరిచిన వారు 50 శాతం, అలాగే రాష్ట్ర స్థాయి క్రీడల్లో సత్తా చాటిన వారు 25 శాతం స్కాలర్‌షిప్‌లను పొందేందుకు అర్హత సాధిస్తారు.

ఇంజనీరింగ్ అండర్ గ్రాడ్యుయేట్ కోర్సులకు సంబంధించి, జేఈఈ మెయిన్ అభ్యర్థులు ట్యూషన్ ఫీజుపై 100% వరకు స్కాలర్‌షిప్‌లు పొందవచ్చు. 95-97.99 పర్సంటైల్ సాధించిన వారికి 75% స్కాలర్‌షిప్ లభిస్తుంది. ప్రవేశ పరీక్షల్లో కనబరిచిన ప్రతిభ, అర్హత పరీక్షల స్కోర్ల ఆధారంగా ఎంబీయుసెట్ మరియు ఏపీఈఏపీసెట్ ద్వారా కూడా ఎంబీయు స్కాలర్‌షిప్‌లను అందిస్తోంది. ఇంజనీరింగ్-యేతర అండర్ గ్రాడ్యుయేట్ కోర్సులలో, అర్హత పరీక్షలలో 95% కంటే ఎక్కువ మార్కులు సాధించిన విద్యార్థులు 35% స్కాలర్‌షిప్‌కు అర్హులు. 90% నుండి 95% వరకు సాధించిన వారు 25%, మరియు 85% నుండి 89.99% మార్కులు సాధించిన వారు 10% స్కాలర్‌షిప్ పొందే అవకాశం ఉంది.