సర్పంచ్, వార్డు సభ్యుల ఎన్నికల్లో శాంతియుత వాతావరణం

2 సర్పంచ్ పదవులు – 77 వార్డు సభ్యులు ఏకగ్రీవం

మిగిలిన గ్రామాల్లో పోటీ హోరాహోరిగా

చివ్వెంల (విజయక్రాంతి): చివ్వెంల మండల పరిధిలో గ్రామపంచాయతీ ఎన్నికల నామినేషన్ల పరిశీలన ప్రక్రియ పూర్తి కావడంతో, రెండు గ్రామాల్లో ఎన్నికల హడావిడి ముగిసింది. గుర్రం తండా, పులి తండా గ్రామ పంచాయతీలు ఏకగ్రీవంగా ఎంపిక కావడం స్థానిక రాజకీయ వర్గాల్లో విశేషంగా నిలిచింది. ప్రజల అభీష్టం మేరకు పోటీ లేకుండానే అభ్యర్థులు ఎన్నికై గ్రామస్థాయిలో శాంతి సంబంధాలు మరింత బలపడ్డాయని స్థానిక పెద్దలు అభిప్రాయపడ్డారు. రాష్ట్ర ఎన్నికల సంఘం జారీ చేసిన నియమావళి ప్రకారం, ఈ రెండు గ్రామాల్లో ఉపసర్పంచ్ ఎన్నికలు కూడా సజావుగా పూర్తయ్యాయి. ఏకగ్రీవ ప్రక్రియలో ఎలాంటి అభ్యంతరాలు, వివాదాలు నమోదు కాకపోవడం గమనార్హం. ఏకగ్రీవాల వివరాలు సర్పంచ్ స్థానాలు 2 వార్డు సభ్యుల స్థానాలు 77 మొత్తం 79 స్థానాలు ఏకగ్రీవంగా ఖరారయ్యాయి.

మిగతా 30 గ్రామాల్లో పోటీ తీవ్రం 

చివ్వెంల మండలంలోని మిగిలిన 30 గ్రామపంచాయతీలు ఎన్నికలకు సిద్ధమవుతున్నాయి. సర్పంచ్ పదవులకు 87 మంది వార్డు సభ్యుల స్థానాలకు 422 మంది అభ్యర్థులు నామినేషన్లు దాఖలు చేయడంతో, పలుచోట్ల త్రిభుజ పోటీ, మరికొన్ని చోట్ల బహుముఖ పోటీ నెలకొనే అవకాశం ఉందని రాజకీయ విశ్లేషకులు చెబుతున్నారు. గ్రామాల్లో అభ్యర్థుల బృందాలు గృహ సమీక్షలు, సమావేశాలతో ప్రచారాన్ని వేగవంతం చేస్తున్నాయి. ప్రజల అభీక్షలు, అభివృద్ధి వాగ్దానాలు, స్థానిక సమస్యల పరిష్కారం—అన్నీ ప్రచారంలో ప్రధాన అంశాలుగా మారాయి. ఎన్నికల అధికారులు మాత్రం ప్రతి గ్రామంలో నిబంధనలను కఠినంగా అమలు చేస్తూ, శాంతియుతమైన ఎన్నికల కోసం ఏర్పాట్లు పూర్తి చేస్తున్నట్లు తెలిపారు.