36 మందికి సత్కారం

హైదరాబాద్, జనవరి 13 (విజయక్రాంతి): మెగాసిటీ నవకళా వేదిక, మదర్ ఫౌండేషన్ ఆధ్వర్యంలో సోమవారం సాయంత్రం అబిడ్స్‌లోని తెలంగాణ సారస్వత పరిషత్‌లో స్వామి వివేకానంద 163వ జయంతి, స్వామి వివేకానంద విశిష్ట పురస్కారాల ప్రదానోత్సవం ఘనంగా నిర్వహించారు. సమాజానికి విశేష సేవలందిస్తున్న వ్యక్తులను సత్కరించడమే ఈ కార్యక్రమ ప్రధాన ఉద్దేశం.

ఈ కార్యక్రమానికి మాజీ కేంద్ర మంత్రి సముద్రాల వెంకుగోపాల్ చారి, ప్రసిద్ధ సరస్వతి ఉపాసకులు దైవజ్ఞశర్మ గౌరవ అతిథిగా పాల్గొన్నారు. ఇతర అతిథులుగా డా. టి. ఆనందమూర్తి (ఎండి, పీజీడీ ఇన్ ఈఎంసీఓఎస్‌ఎం), ఫ్యామిలీ ఫిజిషియన్  క్యూర్ వెల్ క్లినిక్, సాయి కిరణ్ మల్టీ స్పెషాలిటీ హాస్పిటల్, హైదరాబాద్, మాజీ ప్రభుత్వ ప్లీడర్ డి.ఎల్. పండు; శ్రీనిధి సెక్యూర్ ప్రింట్ ప్రైవేట్ లిమిటెడ్ సంస్థకు చెందిన సేల్స్ సపోర్ట్ మేనేజర్ కంజర్ల ఎశ్వర్ చారి; మిర్యాలగూడకు చెందిన అడ్వకేట్ సీహెచ్. రఘురామరావు పాల్గొన్నారు.

ఈ ఏడాది రాష్ట్రవ్యాప్తంగా వైద్యం, విద్య, సామాజిక సేవ, న్యాయం, శాస్త్ర విజ్ఞానం, ఇంజినీరింగ్, సంస్కృతి, సమాజాభివృద్ధి వంటి విభిన్న రంగాల్లో సేవలందిస్తున్న 36 మందిని విశిష్ట పురస్కారాలతో సత్కరించారు. పురస్కార గ్రహీతలలో ఒకరైన డా. సూర్య రామచంద్ర వర్మ గుంటూరి, నిమ్స్ ఆసుపత్రి సీనియర్ సర్జికల్ గ్యాస్ట్రోఎంటరాలజిస్ట్గా ఆసుపత్రి, ఆరోగ్య రంగంలో అందిస్తున్న స్వార్థరహిత సేవలకు గుర్తింపు పొందారు.

సముద్రాల వెంకుగోపాల్ చారి మాట్లాడుతూ.. గత 25 సంవత్సరాలుగా నవకళా వేదిక సమాజం కోసం నిశ్శబ్దంగా సేవ చేస్తున్న వ్యక్తులను గౌరవిస్తోంది. స్వామి వివేకానంద నామంతో ఈ సేవలను గుర్తించడం యువతకు గొప్ప ప్రేరణ అని అన్నారు. దైవజ్ఞ శర్మ మాట్లాడుతూ, స్వామి వివేకానంద జీవితం చరిత్ర, జ్ఞానం, సేవల సమన్వయం. ఇటువంటి కార్యక్రమాలు ఆయన తత్వాన్ని సమాజంలో జీవింపజేస్తున్నాయి అని వ్యాఖ్యానించారు.

నవకళా వేదిక, మదర్ ఫౌండేషన్ వ్యవస్థాపక అధ్యక్షుడు అంకెనపల్లి మల్లికార్జునరావు మాట్లాడుతూ, 2000 సంవత్సరం నుంచి నిరంతరంగా వివేకానంద విశిష్ట పురస్కారాలను నిర్వహిస్తున్నామని తెలిపారు. కార్యక్రమంలో అర్చన నృత్య నికేతన్‌కు చెందిన అర్చన గుట్టి శిష్యుల కూచిపూడి నృత్య ప్రదర్శన ఆకట్టుకుంది. పురస్కారాలు అందుకున్న వారిలో డా. సూర్య రామచంద్ర వర్మ గుంటూరి, దుర్గా ప్రసాద్ జగర్లమూడి, జయరాం జి, వై.ఎన్. సుధాకర్, డా. గణేష్ ఎస్. జైషెత్వర్, పీ. అంజయ్య, డా. నాగలక్ష్మి పట్నాల, ఎం. హరిప్రసాద్, డా. భాను, తేజారెడ్డి పి,

బాలుగారి నర్సింలు ముదిరాజ్, డా. ఉదయ్ చవాన్, డా. దేవరసెట్టి మధు, డా. అమోల్ గుప్తా, కె. పాండరినాథ్, డా. పి. కృష్ణ, పవన్, కుర్మారావు సత్తారు, డా. ప్రశాంత్ కొయ్యొడ, ఎం. విజయ శేఖర్, డా. నల్ల అప్పలరాజు, ఎస్. నర్సింగ్ రావు గౌడ్, డా. రాజ్కిరణ్ ఎమ్మాడి, డా. సత్య గణేశన్, శ్రీరామ్ వేణుగోపాల్, వి. రాఘవేంద్ర స్వామి, ఇంజి. గుజ్జరి శివ శంకర్, జె. లక్ష్మీ నారాయణ, ఇంజి. కల్యాణి తీగల, టి. దివ్య రాజ్, ఇంజి. మధుసూదన్ గోప ఉన్నారు.