‘టీ--హబ్, టీ-వర్క్స్’ తెలంగాణ ఆవిష్కరణలకు జంట స్తంభాలు

1. త్వరలో భారతదేశ ‘మొబిలిటీ వ్యాలీ’గా భాగ్యనగరం ఆవిర్భావం
2. బీఆర్‌ఎస్ వర్కింగ్ ప్రెసిడెంట్ కేటీఆర్
3.   10వ ఎఫ్‌ఎంఏఈ నేషనల్ స్టూడెంట్ మోటార్ స్పోర్ట్స్ పోటీలకు ముఖ్య అతిథిగా హాజరు

హైదరాబాద్, అక్టోబర్ 11 (విజయక్రాం తి) : ప్రపంచంలోనే అత్యంత వేగవంతమైన ఎలక్ట్రిక్ కార్లు హైదరాబాద్ వీధుల్లో పరుగెత్తినప్పుడు, భవిష్యత్ కోసం తెలంగాణ సిద్ధంగా ఉందని రుజువైందని బీఆర్‌ఎస్ వర్కింగ్ ప్రెసిడెంట్ కేటీఆర్ అన్నారు. ఈ రేసు దాదాపు రూ.700 కోట్ల ఆర్థిక కార్యకలాపాన్ని సృష్టిం చి, అంతర్జాతీయ దృష్టిని హైదరాబాద్ వైపు మళ్లించిందని పేర్కొన్నారు. ఫార్ములా ఈవెంట్ ఒక ఆరంభం మాత్రమేనని, తెలంగాణ స్థిరమైన, సాంకేతికత ఆధారిత పారిశ్రా మిక వృద్ధి లక్ష్యాన్ని కలిగి ఉండటంతోపాటు త్వరలోనే హైదరాబాద్ భారతదేశ మొబిలిటీ వ్యాలీగా ఆవిర్భవించబోతోందని ఆయన ధీమా వ్యక్తం చేశారు.

శుక్రవారం కోయంబత్తూరులో జరిగిన 10వ ఎఫ్‌ఎంఏఈ నేషనల్ స్టూడెంట్ మోటార్ స్పోర్ట్స్ పోటీలు-2025కి కేటీఆర్ ముఖ్య అతిథిగా హాజరయ్యారు. ఈ సందర్భంగా దేశంలోని యువ ఇంజనీర్లు, ఆవిష్కర్తలను ఉద్దేశించి కేటీఆర్ ప్రసంగించారు. మరోసారి తెలంగాణ ఆవిష్కరణల ప్రస్థానాన్ని జాతీయ వేదికపై చాటిచెప్పారు. గత ప్రభుత్వం అధికారంలో ఉన్నప్పుడు భారతదేశంలో తొలిసారిగా హైదరాబాద్‌లో విజయవంతంగా నిర్వహించిన ఫార్ములా--ఈ రేస్ నిర్వహణ గురించి ప్రస్తావించారు. తాము నిర్వహించిన ఫార్ములా ఈ రేసు కేవలం ఒక క్రీడా కార్యక్రమం కాదని, ఆవిష్కరణలు, క్లీన్ మొబిలిటీ, అత్యాధునిక సాంకేతికతకు తెలంగాణ కేంద్రంగా ప్రపంచ వేదికపై అడుగు పెట్టిందనడానికి ప్రతీక అని స్పష్టం చేశారు. 

మోటార్‌స్పోర్ట్స్ అంటే కేవలం వేగం కాదని, అది తమ సామర్థ్యాలను పరీక్షించుకోవడం, హద్దులను ఛేదించడం, ఎంత దూరం వెళ్లగలమో తెలుసుకోవడం అన్నారు. జీవితంలో యువత కూడా రేసు కారు మాదిరి దూసుకుపోవాలని ఆకాంక్షించారు. ఐటీ మంత్రిగా తన హయాంలో ప్రపంచంలోనే అతిపెద్ద స్టార్టప్ ఇంక్యుబేటర్ అయిన టీ-హబ్, భారతదేశంలోనే అతిపెద్ద ప్రోటోటైపింగ్ కేంద్రమైన టీ--వర్క్స్ వంటి సంస్థల ద్వారా తెలంగాణ అంతర్జాతీయంగా ప్రశంసలు పొందిన ఆవిష్కరణల పర్యావరణ వ్యవస్థను ఎలా నిర్మించిందో కేటీఆర్ వివరించారు. “ఒక ఆలోచన టీ-హబ్ నుంచి టీ-వ ర్క్స్‌కు వెళ్లడానికి ఒక టీ తాగేంత సమయం మాత్రమే పడుతుంది” అంటూ ఆలోచన అమలు వేగాన్ని చమత్కరించారు. 

యువత ఉద్యోగాలు సృష్టించాలి.. 

అవకాశాల కోసం ఎదురుచూడకుండా, వాటిని మీరే సృష్టించుకోవాలని యువ ఇంజనీర్లకు కేటీఆర్ పిలుపునిచ్చారు. ‘మీరు సొం తంగా ఒక క్యూను సృష్టించగలిగినప్పుడు, ఇతరులు ఏర్పాటు చేసిన క్యూలో ఎందుకు నిల బడాలి?’ అని ప్రశ్నించారు. ‘ఉద్యోగాలు వెతికేవారుగా కాకుండా, ఉద్యోగాలు ఇచ్చేవారుగా మారండి. మీరు పెద్ద కలలు కనడం ప్రారంభించిన తర్వాత, మీ సొంత సామర్థ్యాన్ని చూసి మీరే ఆశ్చర్యపోతారు’ అని ఉద్భోదించారు. తెలంగాణ రాష్ర్ట సాధన ప్రయాణాన్ని ఈ సందర్భంగా కేటీఆర్ గుర్తుచేశారు.

ఒకప్పు డు రాష్ర్ట ఏర్పాటు సాధ్యం కాదని చాలామంది సందేహించారని, కానీ, ‘ఇప్పుడు 11 సంవత్సరాల తర్వాత, అనేక రంగాల్లో దేశానికి ఆదర్శంగా నిలబడ్డామ’ని స్పష్టం చేశారు. తెలంగాణ సాధించిన ప్రగతి విశ్వాసానికి, పట్టుదలకు దార్శనికత నిదర్శనం అన్నారు. ఆదాయం కంటే ప్రభావానికి, అధికారం కంటే ప్రామాణికతకు ప్రాధాన్యత ఇవ్వాలని, వేగం, విస్తరణ పట్ల ఆకలిని కలిగి ఉండాలని నేటి యువతరం, జెన్ జీకి  సందేశాన్ని ఇచ్చారు. ‘మీరు ఇతరులు అనుకున్నదాని కంటే తెలివైనవారు, బాధ్యత కలిగినవారు. భారతదేశాన్ని ముందుకు నడిపించేది మీరే’ అని విద్యార్థులకు తెలిపారు. మోటార్ స్పోర్ట్స్ అయినా, పాలన అయినా, జీవితంలో అయినా విజ యం కేవలం యాదృచ్ఛికంగా రాదని, ‘మనం మన అవకాశాలను రూపొందించుకోవాలి, ధైర్యంతో అమలు చేయాలి. అప్పుడే భవిష్యత్ నిర్మితమవుతుంది’ అని స్పష్టం చేశారు.

వ్యవసాయం నుంచి ఫ్యాషన్ నినాదంతో.. 

‘వ్యవసాయం నుంచి ఫ్యాషన్’ నినాదంతో స్థాపించిన టెక్ట్స్‌టైల్ పార్కు పట్ల ఎంతో సంతోషంగా ఉందని బీఆర్‌ఎస్ వర్కింగ్ ప్రెసిడెంట్ కేటీఆర్ తెలిపారు. వరంగల్‌లోని కాకతీయ మెగా టెక్ట్స్‌టైల్ పార్కులో ఉత్పత్తిపై కేటీఆర్ హర్షం వ్యక్తం చేశారు. ఈ మేరకు శనివారం ఆయన ట్విట్టర్ వేదికగా పోస్టు చేశారు. మొదటి యూనిట్ ఉత్పత్తి ప్రారంభించడం, ప్రపంచ మార్కెట్లకు టీషర్టులు ఎగుమతి చేయడం సంతోషంగా ఉందని పేర్కొన్నారు. తమ ప్రభుత్వ హయాంలో 2023లో కాకతీయ టెక్ట్స్‌టైల్ పార్కులో ఫ్యాక్టరీలకు శంకుస్థాపన చేసినట్టు గుర్తుచేశారు. 11 యంగ్ వన్ కార్పొరేషన్ ఫ్యాక్టరీలకు భూమిపూజ చేశామని పేర్కొన్నారు. అన్ని యూనిట్లు ప్రారం భమైతే.. వరంగల్ ప్రధాన వస్త్ర కేంద్రంగా మారుతుందని వివరించారు.