తాగునీటి ఇబ్బందులు తీర్చాలని రోడ్డెక్కిన మహిళలు

బాన్సువాడ (విజయక్రాంతి): కామారెడ్డి జిల్లా(Kamareddy District) మహమ్మద్ నగర్ మండల కేంద్రంలో వారం రోజులుగా బుడగ జంగాల కాలనీ ప్రజలు తాగునీటికి ఇబ్బందులు పడుతున్నారు. శనివారం తాగునీటి సమస్య పరిష్కరించాలని మహిళలు నిరసన వ్యక్తం చేశారు. మహిళలు బోధన్​-హైదరాబాద్​ ప్రధాన రహదారిపై ఖాళీ బిందెలతో బైఠాయించారు. దీంతో ఇరువైపులా పెద్దఎత్తున వాహనాలు నిలిచిపోయి ట్రాఫిక్​కు అంతరాయం ఏర్పడింది. సమాచారం అందుకున్న ఎస్సై శివకుమార్  సంఘటనా స్థలానికి చేరుకొని మహిళలను సముదాయించారు. పంచాయతీ అధికారులతో మాట్లాడి తాగునీటి ఇబ్బందులు లేకుండా చేస్తామని హామీ ఇవ్వడంతో వారు ఆందోళన విరమించారు.