వచ్చే నెల 8న నిర్వహించేందుకు నిబంధనలు ఖరారు

హుస్నాబాద్: సిద్ధిపేట జిల్లా హుస్నాబాద్‌లోని చారిత్రక ఎల్లమ్మ ఆలయానికి చెందిన ఆరు షాపులను కిరాయికి ఇచ్చేందుకు ఆలయ కార్యనిర్వహణాధికారి కార్యాలయం శనివారం టెండర్-కం-బహిరంగ వేలం ప్రకటనను విడుదల చేసింది. జులై 8న ఉదయం 11 గంటలకు దేవస్థానం ప్రాంగణంలో ఈ వేలంపాట నిర్వహించనున్నారు.

వేలం వివరాలు, షాపుల విస్తీర్ణం

వేలంలో పాల్గొనాలనుకునేవారు పాట ప్రారంభానికి ఒక గంట ముందుగా నిర్దేశిత డిపాజిట్‌తో కూడిన టెండర్‌ను సమర్పించాల్సి ఉంటుందని ఆలయ ఈవో కిషన్ రావు తెలిపారు. ఆయన తెలిపిన వివరాల ప్రకారం, షాపు నంబర్ 1 నుంచి 6 వరకు ఒక్కొక్కటి 100 చదరపు అడుగుల విస్తీర్ణంలో ఉన్నాయి. ప్రతి షాపునకు రూ. 15,000 ధరావత్తుగా చెల్లించాలి. కిరాయి కాలపరిమితి రెండు సంవత్సరాలు, అనగా జులై 16, 2025 నుంచి జులై 15, 2027 వరకు ఉంటుంది.

వేలం ప్రక్రియ, అర్హతలు

వేలంలో పాల్గొనేవారు రూ.100 చెల్లించి టెండర్ షెడ్యూల్ కొనుగోలు చేసి, సీల్డ్ టెండర్లను సమర్పించాల్సి ఉంటుంది. అత్యధిక టెండర్ ధరను ప్రాతిపదికగా తీసుకొని అక్కడి నుంచి బహిరంగ వేలం నిర్వహిస్తారు. దేవస్థాన అధికారులు లాభదాయకమని భావించిన హెచ్చుపాటదారునికి షాపును కేటాయిస్తారు. ఈ వేలం దేవాదాయ ధర్మాదాయ శాఖ చట్టం 30/1987కి లోబడి, దేవాదాయ శాఖ అధికారుల సమక్షంలో నిర్వహించబడుతుందని, వారి ఆమోదానికి లోబడి ఉంటుందని అధికారులు తెలిపారు.

వేలంలో పాల్గొనేవారు ఈవో, శ్రీ రేణుక ఎల్లమ్మ దేవాలయం, హుస్నాబాద్ పేరున గుర్తింపు పొందిన జాతీయ బ్యాంకు నుంచి అకౌంట్ పే డీడీ గానీ, నగదు గానీ గంట ముందుగా చెల్లించి పాల్గొనవచ్చు. అయితే, ధరావత్తు చెల్లించనివారు, దేవాలయానికి బకాయి ఉన్నవారు అనర్హులు. అలాగే, హిందువులు మాత్రమే ఈ వేలంలో పాల్గొనేందుకు అర్హులు. హెచ్చుపాటదారుని ధరావత్తు తప్ప మిగిలిన వారి ధరావత్తు వెంటనే వాపసు చేయబడుతుంది. హెచ్చుపాటదారుని ధరావత్తు పాటకాలం పూర్తయిన తర్వాత ఎటువంటి వడ్డీలు లేకుండా తిరిగి ఇవ్వబడుతుంది.

చెల్లింపులు, షరతులు

హెచ్చుపాటదారుడు ప్రతి నెల 5వ తేదీలోపు తాను పాడిన కిరాయిని దేవస్థానానికి చెల్లించి రశీదు పొందాలి. అలా చేయని పక్షంలో 18 శాతం వడ్డీని చెల్లించాల్సి ఉంటుంది. మూడు నెలల పాటు కిరాయి చెల్లింపులో ఆలస్యం చేస్తే లీజు రద్దు చేయబడుతుంది. హెచ్చుపాటదారుడు తన షాపుకు సంబంధించిన మున్సిపల్ పన్నులు, ఇతర పన్నులు, కరెంట్ బిల్లులను కూడా దేవస్థానం పేరున చెల్లించాలి.

హెచ్చుపాటదారుడు షాపును చూసుకున్న తర్వాతే పాటలో పాల్గొన్నట్లుగా భావించబడుతుందని, పాట తదుపరి ఎటువంటి అభ్యంతరం తెలిపినా దేవస్థానం బాధ్యత వహించదని స్పష్టం చేశారు. అలాగే, కార్యనిర్వహణాధికారి, పర్యవేక్షణాధికారికి ఎటువంటి కారణం తెలుపకుండానే బహిరంగ వేలాన్ని వాయిదా వేసే లేదా రద్దు చేసే అధికారం ఉంటుంది.

లీజు నిబంధనలు, ఇతర షరతులు

హెచ్చుపాటదారుడు తన షాపును ఇతరులకు సబ్ లీజుకు ఇవ్వకూడదు. ఒకవేళ అలా చేసినట్లు తెలిస్తే, ఎటువంటి నోటీసు ఇవ్వకుండానే వారి లీజు రద్దు చేయబడుతుంది. ధరావత్తు, సెక్యూరిటీ డిపాజిట్ దేవస్థాన నిధులకు జమ చేయబడుతుంది. దేవస్థానం షాపును స్వాధీనం చేసినప్పుడు ఏ విధంగా ఉందో, అదే విధంగా తిరిగి అప్పగించాలి. ఎటువంటి మార్పులు, చేర్పులు చేయకూడదు. ఆమోద ఉత్తర్వులు వచ్చిన ఒక వారంలోగా హెచ్చుపాటదారుడు ఒక సంవత్సరము అద్దెను సెక్యూరిటీ డిపాజిట్‌గా చెల్లించాలి. రూ. 100 స్టాంప్ పేపరుపై లీజు డీడ్ రాసి రిజిస్ట్రేషన్ చేయాలి. రిజిస్ట్రేషన్ ఖర్చులు హెచ్చుపాటదారుడే భరించాలి. డీడ్ రాసిన తర్వాతనే లైసెన్స్ హక్కులు ఏర్పడతాయి.

హెచ్చుపాటదారుడు తన వ్యాపారానికి సంబంధించిన లైసెన్స్‌ను దేవస్థానానికి అందజేయాలి. నిషేధిత, అక్రమ వ్యాపారాలు చేస్తే శిక్షార్హులు అవుతారు. దేవస్థానం వారికి ఎప్పుడైనా షాపులను తనిఖీ చేసే అధికారం ఉంటుంది. సెక్యూరిటీ డిపాజిట్ చెల్లింపు, లీజు డీడ్ రాయడం, అద్దె చెల్లింపు లేదా ఇతర షరతులు పాటించకపోయినట్లయితే లీజు రద్దు చేయబడుతుంది. ధరావత్తు దేవస్థాన నిధులకు జమ చేయబడుతుంది. తిరిగి వేలం వేయడం వల్ల నష్టం కలిగితే, అది హెచ్చుపాటదారుని నుండి వసూలు చేస్తారు. అలాగే, హెచ్చుపాటదారుడు తాను పాట వలన పొందిన లైసెన్స్ హక్కును బదిలీ చేయరాదు.