హున్సాలో ఇసుక త్రవ్వకాలపై రైతుల నిరసన
సాలూర, అక్టోబర్ 14(విజయక్రాంతి): సాలూర మండలంలో గల ముంపు గ్రామం(mumpu village) హున్సాలో ఇసుక త్రవ్వకాల వల్ల తమకు నష్టం జరుగుతోందని రైతులు ఆవేదన వ్యక్తం చేశారు. బుధవారం గ్రామ శివారు నుంచి ఇసుకను తరలిస్తున్న టిప్పర్లను అడ్డుకుని నిరసన వ్యక్తం చేశారు. గతేడాది మంజీరా నది వడ్డున ఇసుక తీయడం వల్ల జరిగిన ప్రవాహానికి గ్రామంలోని పంటలు నీట మునిగి నష్టపోయాయని, ఊర్లోకి నీరు రావడం జరిగిందని తెలిపారు.
నష్టపోయిన పంటలకు సంబంధించి నష్టపరిహారం కోరినా ఇంతవరకు అందలేదని వాపోయారు. పక్కనే ఉన్న బాన్సువాడ నియోజకవర్గం రామ్‌గంగానగర్ ప్రాంతంలో యంగ్ ఇండియా స్కూల్ నిర్మాణం కోసం హున్సా నుంచి ఇసుక తీసుకెళ్తున్నారని, నది వడ్డున ఉన్న భూముల నుండి గత పదిహేను రోజులుగా వేలాది ట్రిప్పుల ఇసుకను తరలిస్తున్నారని ఆరోపించారు.
ఇలా ఇసుకను తరలించడం వల్ల భూగర్భ జలాలు అడుగంటిపోయి, మోటార్లు నడిచే పరిస్థితి లేక రైతులు తీవ్ర ఇబ్బందులు పడుతున్నట్లు పేర్కొన్నారు. ముంపు గ్రామం జాబితాలో ఉన్న హున్సాను ఈ త్రవ్వకాల ద్వారా మరింత ప్రమాదంలోకి నెడుతున్నారని ఆందోళన వ్యక్తం చేశారు. సంబంధిత అధికారులు స్పందించి తగిన చర్యలు తీసుకోవాలని రైతులు కోరారు.
