డోర్ల కంపెనీ చెత్త దహనంపై పీసీబీ తనిఖీలు

క్షేత్రస్థాయిలో తనిఖీలు చేసిన అధికారులు.. కఠిన చర్యలు తప్పవని హెచ్చరిక

పటాన్‌చెరు  నవంబర్ 11: గడ్డపోతారం మున్సిపాలిటీ(Gaddapotharam Municipality) పరిధిలోని మాదారం గ్రామం గత కొన్ని రోజులుగా పొగతో ఉక్కిరిబిక్కిరి అవుతోంది. డోర్ల కంపెనీ తన వ్యర్థాలను బహిరంగ ప్రదేశాల్లో డంపింగ్ చేసి, వాటిని తగలబెడుతుండటంతో గ్రామస్తులు తీవ్ర ఇబ్బందులు పడుతున్నారు.

రోజూ సాయంత్రం అయితే చాలు, చెత్త తగలబెట్టిన పొగ గ్రామమంతా వ్యాపిస్తోందని, పిల్లలు, వృద్ధులు దగ్గు, కళ్లు మంట, శ్వాస సమస్యలతో బాధపడుతున్నారని గ్రామస్తులు ఆవేదన వ్యక్తం చేస్తున్నారు. పలుమార్లు కంపెనీ యాజమాన్యానికి చెప్పినా పట్టించుకోలేదని ఆరోపిస్తున్నారు.

గ్రామస్తుల ఫిర్యాదు మేరకు బుధవారం కాలుష్య నియంత్రణ మండలి (పీసీబీ) అధికారులు మాదారం గ్రామానికి చేరుకుని క్షేత్రస్థాయిలో తనిఖీలు నిర్వహించారు. డంపింగ్ చేసిన ప్రదేశాన్ని పరిశీలించి, దహనం చేసిన ఆనవాళ్లను నమోదు చేశారు. బహిరంగ ప్రదేశాల్లో వ్యర్థాలను పడేయడం, తగలబెట్టడం పర్యావరణ చట్టాలకు పూర్తి విరుద్ధమని అధికారులు స్పష్టం చేశారు.

ఈ సందర్భంగా అధికారులు కంపెనీ ప్రతినిధులకు గట్టిగా హెచ్చరిక జారీ చేశారు. "పర్యావరణ కాలుష్యానికి కారణమయ్యే చర్యలను ఎట్టి పరిస్థితుల్లోనూ ఉపేక్షించబోం. నిబంధనలు పాటించకపోతే కఠిన చర్యలు తీసుకుంటాం. జరిమానాతో పాటు కంపెనీపై చట్టపరమైన చర్యలు ఉంటాయి" అని తేల్చి చెప్పారు.

వ్యర్థాలను శాస్త్రీయ పద్ధతిలో నిర్వహించాలని, వెంటనే డంపింగ్, దహనం నిలిపివేయాలని ఆదేశించారు. తనిఖీల నివేదికను ఉన్నతాధికారులకు పంపనున్నట్లు తెలిపారు.

అధికారుల తనిఖీలతో గ్రామస్తులు కాస్త ఊపిరి పీల్చుకున్నారు. తమ సమస్య పరిష్కారం అవుతుందని ఆశాభావం వ్యక్తం చేస్తున్నారు. మరోవైపు కంపెనీపై చర్యలు తీసుకునే వరకు తమ పోరాటం ఆగదని గ్రామస్తులు చెబుతున్నారు.