సైన్స్‌ను నమ్మండి.. మూఢనమ్మకాలను వీడండి!

21-11-2026 | 07:32pm

ఆదిలాబాద్, నవంబర్ 21 (విజయ క్రాంతి): జీవితంలోని ప్రతి అంశం విజ్ఞానశాస్త్రంతో ముడిపడి ఉందని రెవెన్యూ డివిజన్ అధికారి జగదీశ్వర్ రావు అన్నారు. ఆదిలాబాద్‌లోని ఓ ప్రైవేట్ పాఠశాలలో నిర్వహించిన మండల స్థాయి చెకుముకి సైన్స్ టాలెంట్ టెస్ట్‌ను ఆయన ప్రారంభించారు.

ఈ సందర్భంగా ఆయన మాట్లాడుతూ.. ప్రస్తుత కాలంలో సైన్స్ (Science) దినదినాభివృద్ధి చెందుతుండగా, మరోవైపు అశాస్త్రీయ ధోరణులు (Unscientific Practices) కూడా అదే స్థాయిలో పెరుగుతున్నాయని ఆందోళన వ్యక్తం చేశారు. ఎవరైనా ఏ విషయం చెప్పినా గుడ్డిగా నమ్మకుండా, దానిని పరిశీలించి ఆధారాలతో (Evidence) రుజువైన తర్వాతే విశ్వసించాలని సూచించారు. శాస్త్ర సాంకేతిక రంగాల్లో (Science and Technology) ఎంతో అభివృద్ధి సాధించిన ప్రస్తుత తరుణంలోనూ మూఢనమ్మకాలను నమ్మడం సరైంది కాదన్నారు.

రాజ్యాంగంలోని అంశాలపై ప్రజలకు అవగాహన కల్పించడం కేవలం ప్రభుత్వ బాధ్యత మాత్రమే కాదని, ఇందుకు ప్రతి ఒక్కరూ తమ వంతు కృషి చేయాలని పిలుపునిచ్చారు. ఈ కార్యక్రమంలో లిటిల్ ఫ్లవర్ స్కూల్ ప్రిన్సిపల్ దేవేందర్ పటాస్కర్, జన విజ్ఞాన వేదిక రాష్ట్ర కార్యదర్శి నూతుల రవీందర్, గౌరవ అధ్యక్షుడు దయాకర్, జిల్లా కోశాధికారి సంతోష్, వైభవ్, వివిధ పాఠశాలల ఉపాధ్యాయులు, విద్యార్థులు పాల్గొన్నారు.

మరిన్ని వార్తలు