గురువు ముసుగులో కీచకుడు!
ఇల్లెందు టౌన్, అక్టోబర్ 30 (విజయక్రాంతి): ఇల్లెందు మండలం రొంపేడు ఆశ్రమ పాఠశాలలో గిరిజన బాలికపై లైంగిక వేధింపుల (Sexual Harassment) ఆరోపణల నేపథ్యంలో AIYF భద్రాద్రి కొత్తగూడెం జిల్లా బృందం పాఠశాలను సందర్శించి వివరాలు సేకరించింది. తల్లిదండ్రులు లేని తొమ్మిదో తరగతి బాలికను కాంట్రాక్టు ఉపాధ్యాయుడు మాయమాటలతో నమ్మించి, అసభ్యకర సందేశాలు, చాటింగ్ (Online Chatting) ద్వారా వేధించినట్లు బృందం తెలిపింది.
విద్యాబుద్ధులు నేర్పి విద్యార్థులకు బంగారు భవిష్యత్తు అందించాల్సిన ఉపాధ్యాయుడే ఇలాంటి చర్యలకు పాల్పడితే పేద గిరిజన విద్యార్థినుల భద్రత ఏమిటని AIYF ప్రతినిధులు ప్రశ్నించారు. నిందితుడిపై పోక్సో చట్టం (POCSO Act) కింద కేసు నమోదు చేసి జైలుకు పంపినప్పటికీ, ఇలాంటి ఘటనలు పునరావృతం కాకుండా ప్రభుత్వం కఠిన చర్యలు తీసుకోవాలని పాఠశాల ప్రిన్సిపల్ పద్మను కోరారు.
ఆశ్రమ పాఠశాలల్లో విద్యార్థుల భద్రత (Student Safety) విషయంలో నిర్లక్ష్యం వహిస్తే చూస్తూ ఊరుకోబోమని AIYF హెచ్చరించింది. ఈ కార్యక్రమంలో AIYF జిల్లా కార్యవర్గ సభ్యుడు రామకృష్ణ, జిల్లా కౌన్సిల్ సభ్యులు శరత్, దామోదర్, శ్రీకాంత్, సంతోష్, అనిల్, ఆరిఫ్, చేతన్, చరణ్, వెంకట్, వేణు తదితరులు పాల్గొన్నారు.
