విచ్చలవిడిగా పొగాకు విక్రయాలు..?
- పాన్‌షాపులు, కిరాణా దుకాణాల్లో పొగాకు ఉత్పత్తులు
- యువత ఆరోగ్యంపై తీవ్ర ప్రభావం
- అధికారులు స్పందించేదెప్పుడు..?
గుండాల, నవంబర్ 2 (విజయక్రాంతి): మండల కేంద్రంలో పొగాకు ఉత్పత్తులను(Tobacco products) పాన్ షాపులు, కిరాణా దుకాణాలలో(paan shops, grocery stores) విచ్చలవిడిగా విక్రయిస్తున్నారని ఆరోపణలు వెల్లువెత్తుతున్నాయి. గుట్కా, ఖైని, వివిధ రకాల పొగాకు ఉత్పత్తుల వినియోగం ప్రజారోగ్యానికి ముప్పుగా మారుతోందని విమ ర్శలు వినిపిస్తున్నాయి. ముఖ్యంగా యువత ఈ వ్యసనాలకు అలవాటు పడుతుండటం ఆందోళన కలిగిస్తోందని పలువురు అభిప్రాయం వ్యక్తం చేస్తున్నారు.
పొగాకు ఉత్ప త్తుల విక్రయాలపై నిఘా పెట్టాల్సిన సంబంధిత అధికారులు క్షేత్రస్థాయిలో ఎలాంటి చర్యలు తీసుకుంటున్నారనే ప్రశ్నలు ప్రజల్లో వ్యక్తమవుతున్నాయి. చిన్నచిన్న కారణాలతో మొదలయ్యే ఈ అలవాట్లు క్రమంగా వ్యసనాలుగా మారుతున్నాయి. స్నేహితుల ప్రభా వం, ఆసక్తి, అలవాటు పేరుతో గుట్కా, ఖైని, పొగాకు ఉత్పత్తులను వినియోగిస్తూ యువత తమ ఆరోగ్యాన్ని ప్రమాదంలోకి నెట్టుకుంటోంది. పొగాకు వినియోగం నోటి క్యాన్సర్తో పాటు పలు తీవ్రమైన అనారోగ్య సమస్యలకు కారణమవుతుందని వైద్యులు హెచ్చరిస్తున్నా, వినియోగదారుల్లో ఆశించిన మార్పు కనిపించడం లేదు.
పొగాకు ఉత్పత్తుల విక్రయాలపై నిబంధనలు ఉన్నప్పటికీ వాటి అమలుపై నిరంతర పర్యవేక్షణ అవసరం. గుట్కా, పాన్ మసాలా వంటి ఉత్పత్తుల పేరుతో నిషేధిత పదార్థాలు విక్రయిస్తున్నారా..?, దుకాణాల్లో నిబంధనలకు విరుద్ధంగా అమ్మకాలు సాగుతున్నాయా..? అనే అంశాలపై అధికారులు తనిఖీలు నిర్వహించాల్సిన అవసరం ఉంది. అయితే మండల పరిధిలో ఇలాంటి విక్రయాలు జరుగుతున్నాయనే ఫిర్యాదులు ఉంటే వాటిపై విచారణ జరిపి వాస్తవాలను వెలికితీయాల్సిన బాధ్యత సంబంధిత శాఖలపై ఉంది.
పొగాకు ఉత్పత్తుల వినియోగం వ్యక్తిగత ఆరోగ్యానికే కాకుండా కుటుంబాలపై కూడా ప్రభావం చూపుతుంది. సంపాదనలో కొంత భాగాన్ని వ్యసనాల కోసం ఖర్చు చేయడం, అనారోగ్య సమస్యలు తలెత్తడం వల్ల కుటుంబాలు ఆర్థికంగా, మానసికంగా ఇబ్బందులు ఎదుర్కొనే పరిస్థితులు ఏర్పడుతున్నాయి. యువతను వ్యసనాల నుంచి దూరం చేయాల్సిన బాధ్యత కుటుంబాలతో పాటు సమాజంపైనా ఉంది. మండల పరిధిలో గుట్కా, ఖైని, పొగాకు ఉత్పత్తుల విక్రయాలపై సంబంధిత అధికారులు సమగ్ర తనిఖీలు నిర్వహించాలి.
నిబంధనలను ఉల్లంఘించే వ్యాపారులపై, మండలంలో సరఫరా చేసే వ్యక్తులపై చట్టప్రకారం చర్యలు తీసుకోవాలి. పాఠశాలలు, కళాశాలల పరిసరాల్లో పొగాకు ఉత్పత్తుల విక్రయాలపై ప్రత్యేక నిఘా పెట్టాలి. ప్రజలకు, ముఖ్యంగా యువతకు పొగాకు వల్ల కలిగే అనర్థాలపై అవగాహన కల్పించాలి. ప్రజారోగ్యాన్ని కాపాడాల్సిన బాధ్యత అధికారులపై ఉంది. తనిఖీలు, హెచ్చరికలకే పరిమితం కాకుండా చట్టాన్ని ఉల్లంఘించే వారిపై చర్యలు తీసుకున్నప్పుడే పొగాకు విక్రయాలకు అడ్డుకట్ట పడుతుంది. యువత ఆరోగ్యాన్ని బలితీసుకుంటున్న ఈ సమస్యపై అధికారులు ఇకనైనా నిర్లక్ష్యాన్ని వీడి కఠిన చర్యలు చేపట్టాలని ప్రజలు కోరుతున్నారు.
