కార్తీక మాసంలో లక్ష పత్రి పూజ రద్దు

బాలాలయంలో స్థలాభావం.. భక్తులకు ఇబ్బందులు కలగకుండా ఆలయ కమిటీ నిర్ణయం

భూపాలపల్లి/మహాదేవపూర్ నవంబర్ 6 (విజయక్రాంతి): కార్తీక మాసాన్ని పురస్కరించుకొని కాళేశ్వరం(Kaleshwaram)లోని ప్రసిద్ధ శ్రీ కాళేశ్వర ముక్తేశ్వర స్వామి దేవస్థానం అనుబంధ ఆలయమైన శ్రీ ఆది ముక్తేశ్వర స్వామి ఆలయం (బాలాలయం)లో ప్రత్యేక పూజా కార్యక్రమాలు నిర్వహించనున్నట్లు ఆలయ చైర్మన్ అవధాని మోహన్ శర్మ, కార్యనిర్వహణాధికారి మహేష్ తెలిపారు.

నవంబర్ 10వ తేదీ మంగళవారం నుంచి డిసెంబర్ 8వ తేదీ మంగళవారం వరకు కార్తీక మాసం కొనసాగనుంది. ఈ సందర్భంగా బాలాలయంలో నిర్వహించే లక్ష పత్రి పూజను ఈ ఏడాది రద్దు చేస్తున్నట్లు చైర్మన్, ఈఓ వెల్లడించారు. బాలాలయం లోపల స్థలం పరిమితంగా ఉండటంతో లక్ష పత్రి పూజ నిర్వహించే సమయంలో భక్తులకు ఇబ్బందులు కలిగే అవకాశం ఉందని, అందుకే ఈ నిర్ణయం తీసుకున్నట్లు తెలిపారు.

కార్తీక మాసంలో ప్రత్యేక పూజా కార్యక్రమాలు

నవంబర్ 13వ తేదీ శుక్రవారం నాగుల చవితి సందర్భంగా ఉదయం 9:30 గంటలకు నాగులమ్మ పుట్ట వద్ద ప్రత్యేక పూజా కార్యక్రమం నిర్వహించనున్నట్లు తెలిపారు. నవంబర్ 23వ తేదీ సోమవారం వైకుంఠ చతుర్దశి సందర్భంగా రాత్రి 12 గంటలకు లింగోద్భవ పూజ నిర్వహించనున్నారు. నవంబర్ 24వ తేదీ మంగళవారం కార్తీక పౌర్ణమి సందర్భంగా బాలాలయం వద్ద సామూహిక సత్యనారాయణ వ్రతాలు నిర్వహించడంతో పాటు, రాత్రి 7 గంటలకు జ్వాలాతోరణం కార్యక్రమం నిర్వహించనున్నట్లు వెల్లడించారు.

గ్రామస్తులకు ప్రత్యేక దర్శన సమయం

కార్తీక మాసం సందర్భంగా గ్రామస్తుల సౌకర్యార్థం ప్రతిరోజూ ఉదయం 7 గంటల నుంచి 9 గంటల వరకు ప్రత్యేక దర్శన సమయాన్ని కేటాయించినట్లు తెలిపారు. గ్రామస్తులు ఈ సమయాన్ని వినియోగించుకొని స్వామివారిని దర్శించుకోవాలని, ఆలయానికి సహకరించాలని చైర్మన్ అవధాని మోహన్ శర్మ, ఈఓ మహేష్ కోరారు.