జమ్మూ కాశ్మీర్‌లో నాలుగు సార్లు కంపించిన భూమి
జమ్మూ కాశ్మీర్, నవంబర్ 14: హిమాలయ పర్వత ప్రాంతంలో భూమి ఒక్కసారిగా కంపించింది. గంటల వ్యవధిలోనే వరుసగా నాలుగు భూకంపాలు (Earthquakes) సంభవించడంతో జమ్మూ కాశ్మీర్ ప్రజలు అప్రమత్తమయ్యారు. ముఖ్యంగా దోడా, కిష్త్వార్ ప్రాంతాల్లో పలుమార్లు ప్రకంపనలు (Tremors) నమోదయ్యాయి.
శనివారం తెల్లవారుజామున కిష్త్వార్‌లో 3.3 తీవ్రతతో తొలి భూకంపం సంభవించింది. అనంతరం దోడాలో 2.7, 3.8 తీవ్రతతో మరో రెండు ప్రకంపనలు నమోదయ్యాయి. మధ్యాహ్నం 1.09 గంటలకు 2.9 తీవ్రతతో నాలుగోసారి భూమి కంపించింది.
హిమాలయ ప్రాంతం భౌగోళికంగా అత్యంత చురుకైన భూకంప ప్రభావిత ప్రాంతాల్లో ఒకటి. భారతీయ టెక్టానిక్ ప్లేట్ (Indian Tectonic Plate) యురేషియన్ ప్లేట్ వైపు కదులుతుండటంతో భూమి అంతర్భాగంలో ఒత్తిడి పెరుగుతోంది. ఈ ప్రాంతంలోని అనేక ప్రాంతాలు భూకంప ముప్పు ఉన్న జోన్‌ 4, 5 పరిధిలో ఉన్నాయి.
వరుసగా నాలుగు భూకంపాలు సంభవించినప్పటికీ ఇప్పటివరకు ఎలాంటి ప్రాణ, ఆస్తి నష్టం జరగలేదు. అధికారులు పరిస్థితిని ఎప్పటికప్పుడు పర్యవేక్షిస్తూ ప్రజలను అప్రమత్తం చేస్తున్నారు. చిన్న ప్రకంపనలే అయినప్పటికీ నిర్లక్ష్యం చేయకుండా భద్రతా చర్యలు పాటించాలని సూచిస్తున్నారు. భూకంప ముప్పు నేపథ్యంలో ప్రజలు అప్రమత్తంగా ఉండటం అవసరం (Seismic Activity).
