అసత్యం చెప్పిన తీపి కబురు

తేనె పూసిన మాటల తట్టలో

అసత్యం విందును వడ్డిస్తోంది

చిరునవ్వుల చీరె కప్పుకొని

చిత్తాన్ని చీల్చే చురకత్తిని తిప్పుతోంది

పంచదార పాకంలో ముంచిన పలుకు

పగబట్టిన ముళ్లను దాచిన పొద !

కళ్లకు కాటుకలా కనిపించి

కాలికి కంచెగా మారి 

గుచ్చుతోంది చూడు

అబద్ధం ఎంత తియ్యగా ఉంటుందో 

మనం అందులోకి ఆసాంతం 

జారిపోయాక

అవలీలగా అవగాహన అవుతోంది !

తీపి కబురంటే?

టీ కప్పులో చక్కెర కరిగినట్టే

లోపల విషపు బొట్టు కలిసిందని 

మనం ఎలా గ్రహిస్తాం? 

మాటల్లో మల్లెలు చల్లి

మనసుల్లో మంటలు పెడుతోంది.. ఎంచక్కా

చూపుల్లో చంద్రబింబం చూపించి

చీకట్ల బావిలోకి నెట్టేస్తోంది.. 

గొప్ప కవ్వింత నెమ్మదిగా నడిచే 

నిజం నచ్చదు

అసత్యపు మెరుపు వేగం 

ఓ గాఢ ఆలింగనం

అందుకే.. తియ్యగా గుండెల్లోకి 

జారే మాటపై

ఓ కన్నేసి వుంచు ! 

కానీ... కాలం అనే కత్తెర్ల పహారాలో

కల్పితాల దృశ్యాలు చిరిగిపోతూనే ఉంటాయి 

కాస్త ఓపిక పట్టాలి.. నువ్వునా.. నేనైనా !

ఐతే.. తీపి కబుర్లన్నీ 

అసత్యం కావు సుమా.. 

అసత్యాలన్నీ

వందశాతం తియ్యగా వుంటాయబ్బా 

ఒక్కటి నిజంగా నిజం

చేదుగా చెప్పినా.. సత్యమే 

మేలుచేస్తుంది నీకు

కాస్త జాగరుకతగా వుండు..

చేదును భరించినా ఫర్వాలేదు.. సత్యాన్ని కోల్పోకు!!

 డాక్టర్ కటుకోఝ్వల రమేష్