సురక్షిత ఆటో ప్రయాణం కోసం అభయ యాప్

మహబూబాబాద్, నవంబర్ 21 (విజయక్రాంతి): సురక్షితంగా ఆటో ప్రయాణం కోసం మహబూబాబాద్ పోలీసులు నూతనంగా అభయ యాప్ ప్రవేశపెట్టారు. జిల్లా ఎస్పీ సుధీర్ రాంనాథ్ కేకన్ ఆధ్వర్యంలో ఆటో ప్రయాణికుల భద్రతను బలపరిచే కార్యక్రమంలో భాగంగా జిల్లాలోని 1281 ఆటో వాహనాలకు ‘మై టాక్సీ సేఫ్’ అనే అభయ యాప్కు సంబంధించిన క్యూ ఆర్ కోడ్ ఆటోలకు ఏర్పాటు చేశారు. అలాగే ఆటో నడిపే వ్యక్తులను ఒక సంస్థతో అనుసంధానం చేసి, ప్రతి సంవత్సరం 350 రూపాయల ప్రీమియంతో ప్రమాదంలో మరణానికి ఒక లక్ష రూపాయల భీమా అందే విధంగా ఏర్పాటు చేశారు.

ఈ భీమా పత్రాలను శుక్రవారం డ్రైవర్లకు జిల్లా ఎస్పీ కేకన్ సుధీర్ రామ్నాథ్ అందజేశారు. ఆటోలో ప్రయాణిస్తున్న సమయంలో ఏదైనా ఆపద ఎదురైనప్పుడు, ప్రయాణికులు ఆటోపై ఉన్న క్యూ ఆర్ కోడ్ను స్కాన్ చేయగానే డ్రైవర్ ఫోటో, వ్యక్తిగత వివరాలు, వాహన సమాచారము తక్షణమే మొబైల్లో కనిపిస్తాయన్నారు. ఫోన్ నంబర్ని యాప్లో నమోదు చేసి ‘ప్రదేశాన్ని తెలుసుకోండి’ అనే ఎంపికను ఎంచుకుంటే, అత్యవసర కాల్, అత్యవసర ఫిర్యాదు అనే రెండు ఎంపికలు కనిపిస్తాయన్నారు.

లైవ్ స్థానం కమాండ్ కంట్రోల్ కేంద్రానికిప్రయాణికుడు అత్యవసర కాల్ లేదా ఫిర్యాదు పంపిన వెంటనే, వారి లైవ్ స్థానం కమాండ్ కేంద్రానికి చేరుతుందని, ఆటోఎక్కిన క్షణం నుండి దిగే వరకు పర్యవేక్షణ ఉంటుందన్నారు. సమీపంలోని పోలీసు సిబ్బంది వెంటనే అక్కడికి చేరుకుని రక్షణ చర్యలు తీసుకుంటారని, మహిళా ప్రయాణికులు ఆటో ఎక్కే ముందు క్యూ ఆర్ కోడ్ స్కాన్ చేసి డైరెక్టర్ వివరాలు చూసుకోవచ్చన్నారు. ప్రయాణ సమయంలో ఏదైనా వస్తువులు మరిచిపోయినా, యాప్ ద్వారా ఆటోను గుర్తించి తిరిగి పొందవచ్చని, ఆ ఆటో డ్రైవర్ గతంలో ఏదైనా నేరంలో పాలు పంచుకున్నట్లైతే, స్కాన్ చేసిన వెంటనే ‘ఈ ఆటో సురక్షితం కాదు’ అనే ఎరుపు సూచన కనిపిస్తుందన్నారు.

అసభ్య ప్రవర్తన, ర్యాష్ డ్రైవింగ్, మద్యం సేవించి నడపడం, ఢీకొట్టి పారిపోవడం వంటి ఘటనలను కూడా ఈ యాప్ ద్వారా ఫిర్యాదు చేయవచ్చని, ప్రయాణం పూర్తయ్యాక డ్రైవర్కు రేటింగ్ ఇవ్వడానికి కూడా అవకాశం ఉందన్నారు. పోలీసులు ఆటో డ్రైవర్లు ట్రాఫిక్ నియమాలు పాటిస్తూ, పరిమితికి మించి ప్రయాణికులను ఎక్కించకుండా బాధ్యతతో వ్యవహరించాలని సూచించారు. ఈ కార్యక్రమంలో డిఎస్పీ తిరుపతి రావు, టౌన్ సీఐ మహేందర్ రెడ్డి, బయ్యారం సీఐ రాజేష్, డోర్నకల్ సీఐ చంద్రమౌళి, ట్రాఫిక్ ఎస్.ఐ అరుణ్ కుమార్, ట్రాఫిక్ సిబ్బంది, అభయ యాప్ రూపకర్త అభిచరన్, ఆటో డ్రైవర్లు పాల్గొన్నారు.