సీఎం రేవంత్‌కు బీజేఎల్పీ నేత ఏలేటి బహిరంగ లేఖ

హైదరాబాద్, అక్టోబర్ 7 (విజయక్రాంతి): ‘రైతు రుణమాఫీపై బహిరంగ చర్చకు సిద్ధమా ? మాఫీపై శ్వేతపత్రం విడుదల చేయగలరా ?’ అంటూ సీఎం రేవంత్‌రెడ్డికి సోమవారం బీజేఎల్పీ నేత ఏలేటి మహేశ్వర్‌రెడ్డి బహిరంగ లేఖ రాశారు. ఆ కాపీని మీడియాకు సైతం విడుదల చేశారు.

మాఫీ వర్తించక ఎంతోమంది రైతులు అల్లాడుతున్నారని పేర్కొన్నారు. అసెంబ్లీ ఎన్నికల ముందు ఇచ్చిన హామీని సీఎం తుంగలో తొక్కారని ఆరోపించారు. ప్రధాని మోదీ ఈ నెల 5న మహారాష్ట్రలో చేసిన వ్యాఖ్యలపై స్పందించి సీఎం రేవంత్‌రెడ్డి 6న ప్రధానికి లేఖ రాశారని, ఆ లేఖలో సీఎం పచ్చి అబద్ధాలు రాసుకొచ్చారన్నారు.