నీటి కోసం తిప్పలు పడుతున్న బెజ్గం చెరువు తండా గ్రామపంచాయతీ

నాగిరెడ్డిపేట్,(విజయక్రాంతి): మండలంలోని బెజ్గం చెరువు తండా పంచాయతీ(Bejugam cheruvu Thanda Gram Panchayat) తాగునీటి కోసం అలమటిస్తూ తిప్పలు పడుతున్నట్లు గ్రామస్తులు తెలిపారు. తాగునీటి కోసం కిలోమీటర్ దూరం ప్రయాణం చేయాల్సి వస్తుందని,గ్రామ సభలో వినిపించిన ఫిర్యాదుకు సమాధానం లేదని ఆవేదన వ్యక్తం చేస్తున్నారు.కొత్త బోర్, మోటార్ ఏర్పాటు చేయాలని అధికారులను కోరుతున్నారు. బెజ్గం చెరువు తండా జిపి పరిధిలో తాగునీటి సమస్య రోజురోజుకు తలెత్తుతుందని, గత మూడు నెలలుగా పాతబోరు పనిచేయకపోవడంతో తండా ప్రజలు తీవ్ర ఇబ్బందులకు గురవుతున్నారు.తాగునీటి కోసం మహిళలు పిల్లలు గ్రామస్తులు దూరప్రాంతాలకు వెళ్లాల్సి వస్తుందని తెలిపారు.

తాగునీటి సమస్యపై రెండుసార్లు గ్రామసభలో సర్పంచ్ దృష్టికి తీసుకెళ్లినప్పటికీ ఇప్పటివరకు ఎలాంటి చర్యలు చేపట్టలేదని గ్రామస్తులు ఆగ్రహం వ్యక్తం చేస్తున్నారు.తాగునీటి సమస్య పరిష్కారం కోసం తండావాసులు స్వయంగా కొత్త మోటర్ ఏర్పాటు చేసుకునేందుకు ముందుకు రావడంతో సర్పంచ్,ఉప సర్పంచ్ అడ్డుకుంటున్నారని ఆరోపించారు.తండవాసుల తాగునీటి సమస్య పరిష్కరించవలసిన బాధ్యత ఉండవలసింది.కానీ ప్రజా ప్రతినిధులు అడ్డంకులు సృష్టించడం బాధాకరమని తండావాసులు తెలుపుతున్నారు.ఇప్పటికైనా నీటి సమస్యపై మండల అధికారులు జిల్లా అధికారులు తక్షణమే స్పందించి పరిస్థితిని పరిశీలించి కొత్త బోర్ మోటార్ తవ్వడానికి అనుమతులు ఇచ్చి తండ ప్రజల నీటి సమస్యలు తొలగించాలని కోరుతున్నారు.