ముంబయి: ముంబయి విమానాశ్రయంలో ఇటీవల వచ్చిన బాంబు బెదిరింపు కేసులో ముంబై పోలీసులు మంగళవారం ముంబైలోని ఎంఐడీసీ ప్రాంతం నుండి 35 ఏళ్ల వ్యక్తిని అదుపులోకి తీసుకుని విచారిస్తున్నారు. తెల్లవారుజామున ముంబయి పోలీస్ కంట్రోల్ రూమ్‌కు ఛత్రపతి శివాజీ మహారాజ్ అంతర్జాతీయ విమానాశ్రయాన్ని మధ్యాహ్నం 2 గంటలకు పేల్చివేస్తామని బాంబు బెదిరింపు కాల్ వచ్చింది. దీంతో పోలీసులు, బాంబు స్క్వాడ్ బృందాలు ఆ ప్రాంతంలో మూడు గంటల పాటు ఎయిర్‌పోర్ట్‌ను తనిఖీ చేశారు. కానీ అనుమానాస్పదంగా ఏమీ కనిపించలేదని అధికారులు పేర్కొన్నారు. కాల్ చేసిన వ్యక్తిని పోలీసులు గుర్తించారు.

ఉత్తరప్రదేశ్ కు చెందిన మంజీత్ కుమార్ గౌతమ్ గా గుర్తించి అదుపులోకి తీసుకున్నారు. గౌతమ్ ఉత్తరప్రదేశ్ కు చెందినవాడు, కానీ ప్రస్తుతం ముంబైలోని సకినాకా ప్రాంతంలో నివసిస్తున్నాడు. ముంబయి విమానాశ్రయానికి బాంబు నకిలీ బెదిరింపుల కాల్ సంఘటన గత రెండు వారాల్లో ఇది రెండవది. ఈ నెల ప్రారంభంలో ముంబయి విమానాశ్రయం, తాజ్ మహల్ ప్యాలెస్ హోటల్‌లో బాంబులు అమర్చినట్లు పేర్కొంటూ ముంబయి పోలీసులకు ఒక ఇమెయిల్ వచ్చింది. రెండు ప్రదేశాలలో పోలీసులు క్షుణ్ణంగా తనిఖీ చేసిన తర్వాత ఎటువంటి పేలుడు పదార్థాలు కనుగొనబడలేదని, ఆ బెదిరింపులు బూటకమని తేల్చారు.

2001 పార్లమెంటు దాడి సూత్రధారి అఫ్జల్ గురు, రాజకీయ నాయకులు, ప్రభుత్వ అధికారులలో జరుగుతున్న అవినీతిని బయటపెట్టిన యూట్యూబర్ సవుక్కు శంకర్‌లను అన్యాయంగా ఉరితీసిన జ్ఞాపకార్థం బాంబులు అమర్చినట్లు ఈ ఇమెయిల్‌లో పేర్కొన్నారు. చిత్ర నిర్మాత జాఫర్ సాదిక్‌పై ఉన్న మాదకద్రవ్యాల అక్రమ రవాణా కేసును, ఇండియన్ పోలీస్ సర్వీస్ అధికారి జాఫర్ సైట్‌పై ఉన్న మనీలాండరింగ్ దర్యాప్తును కూడా ఎత్తివేయాలని ఈ ఇమెయిల్‌ పంపిన వ్యక్తి డిమాండ్ చేశాడు. ఈ ఇమెయిల్ మహారాష్ట్ర ముఖ్యమంత్రి దేవేంద్ర ఫడ్నవీస్, స్థానిక పోలీస్ స్టేషన్ ఇన్స్పెక్టర్ కు పంపబడింది. పాకిస్తాన్ తో ఉద్రిక్తతలు పెరుగుతున్న నేపథ్యంలో నగరం హై అలర్ట్ ప్రకటించిన కొన్ని రోజులకే ఈ బెదిరింపు సందేశం అందింది. దీనిపై దర్యాప్తు ఇంకా కొనసాగుతోంది.