మంత్రి కొండా సురేఖపై చర్యలకే కాంగ్రెస్ అధిష్టానం మొగ్గు

హైదరాబాద్: తెలంగాణ మంత్రి కొండా సురేఖపై కాంగ్రెస్ అధిష్టానం చర్యలు తీసుకునే అంశం ప్రస్తుతం రాజకీయ వర్గాల్లో చర్చనీయాంశంగా మారింది. ఈ వ్యవహారంపై ముఖ్యమంత్రి రేవంత్ రెడ్డి లండన్ పర్యటన నుంచి తిరిగి వచ్చిన తర్వాత పూర్తి స్పష్టత వచ్చే అవకాశం ఉన్నట్లు పార్టీ వర్గాల్లో ప్రచారం జరుగుతోంది. మరోవైపు, సురేఖ స్థానంలో మంత్రిత్వ శాఖ దక్కించుకునేందుకు పలువురు ఆశావహులు ప్రయత్నాలు ముమ్మరం చేసినట్లు తెలుస్తోంది. స్టేట్ కమాండ్‌తో పాటు హైకమాండ్‌కు తమ ఆసక్తిని పరోక్షంగా తెలియజేస్తున్న ఇద్దరు, ముగ్గురు ఎమ్మెల్యేల పేర్లు ప్రస్తుతం రాజకీయ వర్గాల్లో వినిపిస్తున్నాయి.

కొత్త మంత్రి ఎంపికలో బీసీ సామాజికవర్గానికి ప్రాధాన్యత లభించే అవకాశం ఉందనే అభిప్రాయం కాంగ్రెస్‌లోని కొందరు నేతల్లో బలంగా ఉన్నట్లు సమాచారం. ఈ నేపథ్యంలో బీసీ సామాజికవర్గానికి చెందిన పలువురు ఎమ్మెల్యేలు మంత్రి పదవిపై ఆశలు పెట్టుకున్నట్లు తెలుస్తోంది. ఈసారి మంత్రివర్గంలో ఖాళీ ఏర్పడితే ఎమ్మెల్యేల నుంచే కొత్త మంత్రిని ఎంపిక చేసే అవకాశం ఉందని పార్టీ వర్గాల్లో చర్చ జరుగుతోంది. అయితే సురేఖపై తుది నిర్ణయం, తదుపరి మంత్రి ఎవరనే అంశాలపై అధిష్టానం నుంచి అధికారిక ప్రకటన రావాల్సి ఉంది. రేవంత్ రెడ్డి హైదరాబాద్‌కు తిరిగి వచ్చిన తర్వాత ఈ వ్యవహారంపై మరింత స్పష్టత వచ్చే అవకాశం ఉందని పార్టీ వర్గాలు భావిస్తున్నాయి.