* మాజీ మంత్రి జోగురామన్న..

* ఆదిలాబాద్ లో ఘనంగా దీక్షా దివస్..

ఆదిలాబాద్ (విజయక్రాంతి): తెలంగాణను సాధించడం కోసం కేసీఆర్ ప్రాణాలకు తెగించి కోట్లడటంతోనే ప్రత్యేక రాష్ట్రం ఏర్పాటు అయిందని మాజీ మంత్రి, బీఆర్ఎస్ జిల్లా అధ్యక్షులు జోగురామన్న అన్నారు. దీక్షా దివస్ ను పురస్కరించుకుని ఆదిలాబాద్ బీఆర్ఎస్ పార్టీ కార్యాలయంలో శనివారం ఏర్పాటు చేసిన కార్యక్రమంలో బోథ్ ఎమ్మెల్యే అనిల్ జాదవ్ తో కలిసి ఆయన పాల్గొన్నారు. ముందుగా తెలంగాణ తల్లి విగ్రహానికి పూలమాలలు వేసి కార్యక్రమాన్ని ప్రారంభించారు. ఉద్యమ కాలం నాటి చాయా చిత్రాల ప్రదర్శనను వీక్షించి ఆనాటి జ్ఞాపకాలను గుర్తు చేసుకున్నారు. జై తెలంగాణ, జై కేసీఆర్ నినాదాలతో కార్యాలయ ప్రాంగణం మారుమోగింది. అంతకుముందు లక్ష్మీపూర్, రామాయి గ్రామస్తులు, ధోభి కాలనీకి చెందిన పలువురు పార్టీలో చేరగా.. వారికి గులాబి కండువాలు కప్పి ఆహ్వానం పలికారు. 

ఈ మేరకు మాజీమంత్రి జోగు రామన్న, బోథ్ ఎమ్మెల్యే అనిల్ జాదవ్ మాట్లాడుతూ.. చరిత్రలో నిలిచిపోయేలా దీక్షను చేపట్టి తెలంగాణను సాధించిన కేసీఆర్ రాష్ట్రాన్ని అన్ని రంగాల్లో అభివృద్ధి చేశారన్నారు. పదేళ్ళ పాలనలో ప్రజా సంక్షేమమే ధ్యేయంగా ముందుకు సాగినట్లు పేర్కొన్నారు. స్థానిక సంస్థల ఎన్నికలను దృష్టిలో ఉంచుకుని ప్రస్తుత ప్రభుత్వ వైఫల్యాలు, గతంలో అమలు చేసిన సంక్షేమ పథకాలు, రాష్ట్ర సాధనలో బీఆర్ఎస్ పాత్రను ప్రజల ముందుంచాలని పేర్కొన్నారు. కేసీఆర్ ఉద్యమ స్పూర్తితో ప్రస్తుత ప్రభుత్వ వైఫల్యాలను ఎండగట్టాలని, గ్రామగ్రామాన ప్రభుత్వ ప్రజా వ్యతిరేక విధానాలను వివరిస్తూ చైతన్యపరచాల్సిన అవసరముందన్నారు. ఈ కార్యక్రమంలో నేతలు మనోహర్, యూనుస్ అక్బని, తుల శ్రీనివాస్ తదితరులు పాల్గొన్నారు.