రష్మిక మందన్న, దీక్షిత్‌శెట్టి జంటగా నటిస్తున్న సినిమా ‘ది గర్ల్‌ఫ్రెండ్’. ఈ చిత్రాన్ని ప్రముఖ నిర్మాత అల్లు అరవింద్ సమర్పణలో గీతాఆర్ట్స్, ధీరజ్ మొగిలినేని ఎంటర్‌టైన్‌మెంట్ బ్యానర్స్ సంయుక్తంగా నిర్మిస్తున్నాయి. ఇంటెన్స్, ఎమోషనల్ లవ్‌స్టోరీతో దర్శకుడు రాహుల్ రవీంద్రన్ తెరకెక్కిస్తున్నారు. ధీరజ్ మొగిలినేని, విద్య కొప్పినీడి నిర్మాతలుగా వ్యవహిస్తున్నారు. ఈ సినిమా నవంబర్ 7న తెలుగు, హిందీ, తమిళ, మలయాళ, కన్నడ భాషల్లో థియేట్రికల్ రిలీజ్‌కు రాబోతోంది. ఈ సందర్భంగా ఈ సినిమా హైలైట్స్‌ను డైరెక్టర్ రాహుల్ మీడియాతో పంచుకున్నారు.

నేను కాలేజ్‌లో ఉన్నప్పుడు చూసిన ఒక సంఘటన ఆధారంగా ఈ కథ రాశాను. అప్పట్లో వచ్చిన ఓ పాట కూడా నన్ను ఈ కథ రాసేందుకు పురిగొల్పింది. అలా టైమ్ ఉన్నప్పుడు కొన్ని స్క్రిప్ట్స్ చేసుకున్నా. తొలుత ఆహా వాళ్లు అడిగితే ‘ది గర్ల్‌ఫ్రెండ్’ కథ పంపా. నేను, రష్మిక, గీతాఆర్ట్స్ కాంబోలో ఒక సినిమా చేయాల్సి ఉండేది. ఈ కథను అల్లు అరవింద్ చదివి దీంట్లో సినిమా కంటెంట్ ఉంది.. ఓటీటీకి వద్దని చెప్పారు. మా కాంబోలో ముందు అనుకున్న కథ పక్కనపెట్టి దీన్నే సినిమాగా మొదలుపెట్టాం. 

రష్మికకు స్క్రిప్ట్ పంపితే, రెండు రోజుల్లోనే మొత్తం చదివి కాల్ చేసింది. ఈ సినిమా మనం వెంటనే చేస్తున్నాం.. ఇలాంటి కథ ప్రేక్షకులకు చెప్పాలి. ఒక అమ్మాయిగా నేను ఈ కథకు చాలా కనెక్ట్ అయ్యాను. అమ్మాయిలందరికీ నేనిచ్చే బిగ్ హగ్ ఈ సినిమా అని చెప్పింది. నేను ఏ కథ రాసినా నా స్నేహితులు సమంత, వెన్నెల కిషోర్, అడివి శేష్, డైరెక్టర్ సుజీత్.. ఇలా కొంతమందికి పంపిస్తుంటా. అలా ఈ కథ కూడా పంపా. సమంతను ఈ సినిమాలో హీరోయిన్‌గా అనుకున్నారనే వార్తలూ వచ్చాయి. సమంత ఈ స్క్రిప్ట్ చదివి, నేను కాదు మరొక హీరోయిన్ అయితేనే ఈ మూవీకి బాగుంటారని సూచించింది. 

టీజర్, ట్రైలర్‌లో ప్రేక్షకులను కావాలనే మిస్ డైరెక్ట్ చేశాం. మెయిన్ కంటెంట్ థియేటర్‌లో చూస్తేనే ఎంజాయ్ చేస్తారు. ట్రైలర్‌లో ఉన్న హై వోల్టేజ్ ఇంటెన్స్ డ్రామా సెకండాఫ్‌లో ఉంటుంది. ఆ డ్రామా సర్‌ప్రైజ్ చేస్తుంది. ఒక జంట జీవితంలో జరిగినదాన్ని నాకు తెలిసిన పద్ధతిలో చూపించాను. అంతేకానీ ఎలాంటి సందేశాలు, నీతులు చెప్పలేదు. నేను ఇవాళ మంచి అనుకున్నది ఐదేళ్ల తర్వాత కరెక్ట్ కాదని నాకే అనిపించవచ్చు. అందుకే ఎవరికీ మెసేజ్‌లు ఇచ్చే ధైర్యం చేయను. ఇంటెన్స్ ఎమోషన్ ఉన్న లవ్‌స్టోరీని రియలిస్టిక్ అప్రోచ్‌లో చేశాం. 

రష్మిక ‘యానిమల్’ రిలీజై వందల కోట్లు వసూళ్లు సాధిస్తున్నప్పుడు నాక్కొంచెం భయమేసింది. రష్మికను ఇంత రియలిస్టిక్‌గా చూపిస్తున్నాం.. అక్కడేమో ‘యానిమల్’ ప్రేక్షకులపై మరో ఇంప్రెషన్ వేస్తోందని అనుకున్నా. రష్మికకు నా సందేహం తెలిసి ‘ఈ కథకు మీరు నన్ను ఇలాగే స్క్రీన్‌పై ప్రెజెంట్ చేయాలి.. రియలిస్టిగ్గానే నా క్యారెక్టర్ కనిపించాలి’ అని సపోర్ట్ చేసింది. మనం ఉమెన్ సెంట్రిక్ మూవీస్ అని పిలుస్తుంటాం కానీ, ఆ ముద్ర పోయేందుకు ఇంకా చాలా టైమ్ పడుతుంది. ఈ కథలో హీరో, హీరోయిన్ ఇద్దరి పాత్రలకు ప్రాధాన్యం ఉంటుంది. కాకపోతే ఈ కథను హీరోయిన్ పాయింట్ ఆఫ్ వ్యూలో చూపిస్తున్నాం. 

ఈ సినిమాలోని విక్రమ్ క్యారెక్టర్ కోసం సెర్చ్ చేశాను. ఈ అబ్బాయి కాలేజ్‌లో అడుగుపెట్టగానే చాలామంది అమ్మాయిలు ఇష్టపడతారు అనేలా కనిపించాలి అనుకున్నా. దసరా సినిమా ప్రమోషనల్ ఇంటర్వ్యూస్‌లో దీక్షిత్‌ను చూసి ఇతను విక్రమ్ క్యారెక్టర్‌కు బాగుంటాడు అనిపించింది. సినిమాలో హీరో, హీరోయిన్ పీజీ స్టూడెంట్స్. ఒక లెక్టరర్ రోల్ ఉంది. ఆ క్యారెక్టర్ డైరెక్టర్ సందీప్‌రెడ్డి వంగా చేస్తే బాగుంటుందనిపించింది. ఆయనను సంప్రదిస్తే ‘వద్దు, నన్ను స్క్రీన్ మీద చూడగానే ఆడియెన్స్ నవ్వుతారు’ అని రిజెక్ట్ చేశారు. చివరకు ఆ రోల్ నేనే చేయాల్సి వచ్చింది. అనూ ఇమ్మాన్యుయేల్ కూడా తన క్యారెక్టర్‌కు పర్పెక్ట్‌గా సెట్ అయ్యింది.

హేషమ్ అబ్దుల్ వాహాబ్ మంచి మ్యూజిక్ ఇచ్చారు. ఆయన సంగీతంతో సినిమాలోని ఫీల్ మరింత పెరిగింది. తనతో వర్క్ చేసిన ఎక్స్‌పీరియన్స్ బాగుంది. 

నా జీవితంలో నేను చూసినవి, చదివినవి, తెలుసుకున్న సంఘటల నుంచి స్ఫూర్తి పొంది కథ రాస్తుంటాను. దర్శకుడిగా నాకొక తరహా, ఒక ముద్ర ఉండాలని ఎప్పుడూ కోరుకోలేదు. నేను కొన్ని సినిమాలు చేశాక అందులో నా తరహా విలువలు, నమ్మకాలు చూసి ప్రేక్షకులకు రాహుల్ డైరెక్షన్‌లో ఇలాంటి సెన్సబిలిటీస్ ఉన్నాయనే ఇంప్రెషన్ కలుగుతుందేమో.

నెక్ట్స్ నేను డైరెక్ట్ చేయబోయే రెండు ప్రాజెక్ట్స్ ఓకే అయ్యాయి. వాటి వివరాలు త్వరలో తెలియజేస్తాను. ఈ రెండు సినిమాల తర్వాత రష్మిక, నేను కలిసి మరో సినిమా చేయబోతున్నాం. ఆ కథ లైన్‌గా రష్మికకు నచ్చింది. ఇంకా స్క్రిప్ట్ చేయాల్సి ఉంది. మా కాంబోలో ఆ సినిమా వస్తుంది. 

నేను అసిట్టెంట్ డైరెక్టర్ ఛాన్స్ కోసం వెయిట్ చేస్తున్న టైమ్‌లో హీరోగా అవకాశం వచ్చింది. పరిచయాలు పెరుగుతాయి కదా అని హీరోగా నటించాను. కానీ, నా ఆలోచన ఎప్పుడూ డైరెక్షన్, రైటింగ్ వైపే ఉండేది. ఇప్పుడు కూడా హీరోగా అవకాశాలు వస్తున్నాయి. అయితే, హీరోగా నటించడమంటే ఒక కమిట్‌మెంట్ ఉండాలి. దాదాపు ఏడాది పాటు ఆ సినిమాకే టైమ్ కేటాయించాలి. నేను డైరెక్టర్‌గా మొదటి సినిమా చేసినప్పుడే హీరోగా వద్దు అనుకున్నా. నటించడాన్ని ఎంజాయ్ చేస్తాను కానీ, డైరెక్షన్ అనేది నా కెరీర్‌గా భావిస్తా. 20 రోజుల కాల్షీట్ ఉండే క్యారెక్టర్స్ అయితే ఒప్పుకుంటున్నా. ఆ దర్శకుడి దగ్గర నుంచి ఏదైనా నేర్చుకోవచ్చనేది కూడా నా మైండ్‌లో ఉంటుంది. సుజిత్ నా ఫ్రెండ్.. ఆయన చెప్పగానే ‘ఓజీ’లో నటించాను. హను రాఘవపూడి తన సినిమాకు పిలిస్తే తప్పకుండా వెళ్తా. ఆయన ఇప్పుడు ప్రభాస్‌తో సినిమా చేస్తున్నారు. ఇంకా పెద్ద సినిమాలు చేయాలని కోరుకుంటున్నా. హను తన తర్వాతి సినిమాలో హీరోగా నటించమని అడిగితే మాత్రం నటిస్తా.