రాష్ట్ర ఐటీ, పరిశ్రమల శాఖ మంత్రి దుద్దిళ్ల శ్రీధర్ బాబు..

మహదేవపూర్/భూపాలపల్లి (విజయక్రాంతి): రాయలసీమ సంస్కృతి కాదు విద్యా సంస్కృతే మా అభిమాతం అని రాష్ట్ర ఐటీ పరిశ్రమల శాఖ మంత్రి దుద్దిళ్ల శ్రీధర్ బాబు(Minister Duddilla Sridhar Babu) అన్నారు. సోమవారం మండల కేంద్రంలోని పాఠశాలల ఆవరణలో జరిగిన కార్యక్రమంలో మాట్లాడుతూ.. మంథని నియోజకవర్గాన్ని విద్యాపరంగా, అభివృద్ధి చేసి అందరికీ అవకాశాలు కల్పించడమే నా ప్రధాన లక్ష్యం అన్నారు. ప్రైవేటు పాఠశాలలకు ధీటుగా ప్రభుత్వ పాఠశాలను తీర్చిదిద్దాలనే లక్ష్యంతో ముఖ్యమంత్రి రేవంత్ రెడ్డి(CM Revanth Reddy) కృషి చేస్తున్నారని అన్నారు. గివ్ స్వచ్ఛంద సంస్థ హైదరాబాద్ ఆధ్వర్యంలో పాఠశాలల్లోని 650 మంది విద్యార్థులకు షూస్, స్పోర్ట్స్ షూస్ పంపిణీ చేశారు.

మొదటగా పాఠశాల ఆవరణలో అటవీ శాఖ అధ్వర్యంలో ఏర్పాటు చేసిన వన మహోత్సవంలో భాగంగా జిల్లా కలెక్టర్ రాహుల్ శర్మ(District Collector Rahul Sharma), ట్రేడ్ ప్రమోషన్ కార్పొరేషన్ చైర్మెన్ అయిత ప్రకాష్ రెడ్డితో కలిసి మొక్కలు నాటారు. ఖేల్ ఇండియా కార్యక్రమంలో భాగంగా ఉత్తమ ప్రతిభ కనబరిచిన విద్యార్థులకు ప్రశంసా పత్రాలు అందజేశారు. ప్రభుత్వం విద్యా వ్యవస్థను మెరుగు పరిచేందుకు పెద్దఎత్తున కృషి చేస్తుందని అన్నారు. స్వయంగా ముఖ్యమంత్రి రేవంత్ రెడ్డి విద్యాశాఖకు ప్రాతినిధ్యం వహిస్తూ గ్రామీణ స్థాయి నుండి పాఠశాలలను బలోపేతం చేసేందుకు అమ్మ ఆదర్శ పాఠశాల కార్యక్రమం ద్వారా మౌలిక సదుపాయాలు కల్పించారని, ప్రతి నియోజక వర్గానికి మోడల్ ఇంటిగ్రేటెడ్ రెసిడెన్షియల్  స్కూల్ కాంప్లెక్స్ లను నిర్మిస్తున్నారని, టీచర్ల కొరత లేకుండా టీచర్ పోస్టులు భర్తీ చేసీ ప్రమోషన్లు ఇవ్వడం జరిగిందని తెలిపారు.

విద్యార్థులకు ఉచితంగా యూనిఫామ్ లు, పుస్తకాలు అందిస్తూ నూతన డైట్ మెనూను తీసుకువచ్చి నాణ్యమైన ఆహారం అందిస్తున్నామని అన్నారు. ఇప్పటికే నియోజకవర్గంలోని పాఠశాలకు డ్యూయల్ డెస్క్ బెంచీలను పంపిణీ చేశామన్నారు. మహదేవ్ పూర్ ప్రభుత్వ పాఠశాలకు మంచి చరిత్ర ఉందని ఈ పాఠశాలలను ఒక పైలెట్ ప్రాజెక్ట్ గా తీసుకుని సి.ఎస్.ఆర్ నిధులు సుమారు 15 కోట్లతో అభివృద్ధికి ప్రణాళికలు సిద్ధం చేయడం జరుగుతుందని త్వరలోనే శంకుస్థాపన చేస్తామని అన్నారు. ఈ పాఠశాలల్లో కంప్యూటర్ ల్యాబ్ త్వరలో ప్రారంభిస్తామని అన్నారు. మహదేవ్ పూర్ ప్రభుత్వ పాఠశాలల ఉపాధ్యాయులు ఉత్తమ ప్రతిభ కనబరుస్తూ విద్యార్థులను సొంత పిల్లలుగా భావించి మెరుగైన విద్యను అందిస్తున్నారని అభినందించారు. ఈ సంవత్సరం ప్రైవేట్ పాఠశాల నుండి సుమారు 245 మంది విద్యార్థులు ప్రభుత్వ పాఠశాలలో చేరడం గొప్ప విషయం అని హర్షం వ్యక్తం చేశారు. 

విద్యార్థులు ప్రభుత్వం చేస్తున్న అభివృద్ధిని గమనించాలని రాబోయే రోజుల్లో గొప్ప స్థాయిలో ఎదిగి ప్రభుత్వానికి, గ్రామానికి తల్లి దండ్రులకు మంచిపేరు తేవాలని మంత్రి కోరారు. ఈ కార్యక్రమంలో జిల్లా కలెక్టర్ రాహుల్ శర్మ మాట్లాడుతూ.. విద్యార్థులు చాలా చురుకుగా విద్యను అభ్యసిస్తున్నారని ప్రభుత్వ పాఠశాలలలో చదువుతున్న విద్యార్థిని, విద్యార్థులకు మెరుగైన విద్యను అందించేందుకు ప్రభుత్వం కృషి చేస్తుందని విద్యార్థుల సౌకర్యార్ధం అమ్మ ఆదర్శ పాఠశాల ద్వారా మౌలిక సదుపాయాలు కల్పించామన్నారు. అంతేకాకుండా బాలికల కోసం జిల్లాలో మొట్టమొదటి సారిగా మహాదేవపూర్ జిల్లా పరిషత్ బాలికల  పాఠశాలలో సానిటరీ నాప్కిన్ వెండింగ్ మిషన్ రూ.5 లక్షలతో ఏర్పాటు చేయబోతున్నట్లు తెలిపారు.

విద్యార్థులు చక్కగా చదువుకొని గొప్ప స్థాయికి ఎదగాలని జిల్లా కలెక్టర్ ఆకాంక్షించారు. ఈ కార్యక్రమంలో సబ్ కలెక్టర్ మాయాంక సింగ్, అదనపు కలెక్టర్ విజయ లక్ష్మీ, జిల్లా విద్యాశాఖ అధికారి రాజేందర్, గివ్ ఫౌండేషన్ ప్రతినిధులు అరుణ్,బ్లాక్ కాంగ్రెస్ అధ్యక్షుడు కోట రాజబాబు, మండల కాంగ్రెస్ పార్టీ అధ్యక్షుడు అక్బర్ ఖాన్ , ప్రాథమిక సహకార సంఘం చైర్మన్ చల్ల తిరుపతయ్య, కాంగ్రెస్ నాయకులు, వామన్ రావు, మాజీ ఎంపిటిసి అభ్యర్థుల సుధాకర్, యూత్ నాయకులు విలాస్ రావు, అశోక్, నాయకులు, ప్రజలు తదితరులు పాల్గొన్నారు.