బెంగళూరు: కర్ణాటక సీఎం కుర్చీ పంచాయతీ ముగిసినట్లే కొడుతుంది. ముఖ్యమంత్రి పదవి కోసం పోటీ పడుతున్న సిద్ధరామయ్య, డీకే శివకుమార్ బ్రేక్ ఫాస్ట్ భేటీతో వివాదం సద్దు మణిగింది. కాంగ్రెస్ ప్రభుత్వంపై ప్రజలు నమ్మకం పెట్టుకున్నారని డీకే శివకుమార్ అన్నారు. ముఖ్యమంత్రి సిద్ధరామయ్యతో అల్పాహార సమావేశం తర్వాత, కర్ణాటక డిప్యూటీ సీఎం డీకే శివకుమార్(Karnataka Deputy CM DK Shivakumar) మాట్లాడుతూ.. ప్రజలకు ఇచ్చిన హామీలు అమలు చేయడమే మా ప్రధాన లక్ష్యమన్నారు.

అసెంబ్లీ సమావేశాల్లో అనుసరించాల్సిన వ్యూహంపై చర్చించామని తెలిపారు. కాంగ్రెస్ అధిష్ఠానం ఆదేశాలకు ఎల్లప్పుడూ కట్టుబడి ఉంటామని వివరించారు. ఇద్దరం కలిసే ఉంటాం.. కలిసే పనిచేస్తామని డీకే తేల్చిచెప్పారు. ప్రతిపక్షాలను ఎలా ఎదుర్కోవాలన్న అంశంపై బ్రేక్ ఫాస్ట్ భేటీలో చర్చించామని తెలిపారు. మాలో ఎలాంటి వర్గాలు లేవని డీకే తెలిపారు. అల్పాహార సమావేశం తర్వాత కర్ణాటక డిప్యూటీ సీఎం డీకే శివకుమార్ ముఖ్యమంత్రి సిద్ధరామయ్య నివాసం నుంచి బయలుదేరారు. నాయకత్వ మార్పు అంశంపై, సీఎం, డిప్యూటీ సీఎం ఇద్దరూ హైకమాండ్ ఏది చెబితే అది పాటిస్తామని, ఇద్దరూ ఐక్యంగా, కలిసి పనిచేస్తున్నామని చెప్పారు.