ఇస్తాంబుల్: టర్కీలోని వాయువ్య ప్రావిన్స్ బలికేసిర్‌లో(Balıkesir Province) 6.1 తీవ్రతతో సంభవించిన భూకంపం కనీసం ఒకరు మృతి చెందగా, డజనుకు పైగా భవనాలు కూలిపోయాయని అధికారులు తెలిపారు. కనీసం 29 మంది గాయపడ్డారు. ఆదివారం స్థానిక సమయం ప్రకారం సాయంత్రం 7:53 గంటలకు (1653 GMT) సిందిర్గి జిల్లాలో భూకంపం సంభవించిందని విపత్తు, అత్యవసర నిర్వహణ ప్రెసిడెన్సీ (AFAD) నివేదించింది. అత్యవసర బృందాలు రక్షించిన తర్వాత 81 ఏళ్ల వృద్ధుడు మరణించాడని, 29 మంది గాయపడ్డారని, 15కి పైగా భవనాలు కూలిపోయాయని అంతర్గత మంత్రి అలీ యెర్లికాయ తెలిపారు.  సిందిర్గి పట్టణంలో భూకంప కేంద్రం ఉన్నందున, 1.6 కోట్లకు పైగా జనాభా ఉన్న ఇస్తాంబుల్‌లో ఉత్తరాన 200 కిలోమీటర్ల దూరంలో ప్రకంపనలు సంభవించాయి.

గాయపడిన వారిలో ఎవరి పరిస్థితి విషమంగా లేదని మంత్రి తెలిపారు. ప్రస్తుతం సహాయక చర్యలు కొనసాగుతున్నాయని వెల్లడించారు. భూకంపం(Earthquake) తర్వాత 4.6 తీవ్రతతో సహా అనేక అనంతర ప్రకంపనలు వచ్చాయని, దెబ్బతిన్న భవనాల్లోకి ప్రవేశించవద్దని పౌరులను కోరినట్లు టర్కీ విపత్తు అత్యవసర నిర్వహణ సంస్థ తెలిపింది. బాధిత పౌరులందరూ త్వరగా కోలుకోవాలని అధ్యక్షుడు రెసెప్ తయ్యిప్ ఎర్డోగాన్ ఒక ప్రకటన విడుదల చేశారు. టర్కీ ప్రధాన భూభంగ రేఖల పైన ఉంది. దీంతో భూకంపాలు తరచుగా జరుగుతాయి. 2023లో, టర్కీలో 7.8 తీవ్రతతో సంభవించిన భూకంపం 53,000 మందికి పైగా మృతి చెందారు. 11 దక్షిణ, ఆగ్నేయ ప్రావిన్సులలో లక్షలాది భవనాలు ధ్వంసమయ్యాయి. పొరుగున ఉన్న సిరియా ఉత్తర ప్రాంతాలలో మరో 6,000 మంది మరణించారు. భూకంపం తర్వాత బలికేసిర్ ప్రావిన్స్‌లో అనేక భవనాలు కూలిపోయాయని టర్కిష్ మీడియా ప్రసారం చేసిన చిత్రాలు ఇంటర్ నెట్ లో వైరల్ అవుతున్నాయి.