ఓఆర్‌ఆర్‌పై ఘోర రోడ్డుప్రమాదం.. తండ్రి, కొడుకు స్పాట్ డెడ్

హైదరాబాద్: నగర శివారులోని ఆదిభట్ల సమీపంలో ఉన్న ఔటర్ రింగ్ రోడ్ (Outer Ring Road) సర్వీస్ రోడ్డుపై మంగళవారంనాడు గుర్తుతెలియని వాహనం ఒక మోటార్‌సైకిల్‌ను ఢీకొన్న ఘోర రోడ్డు ప్రమాదంలో ఒక వ్యక్తి, అతని చిన్న కుమారుడు మృతి చెందగా, మరో ఇద్దరు తీవ్ర గాయాల పాలయ్యారు. పోలీసుల వివరాల ప్రకారం, బాధితులను వనస్థలిపురంలోని సాహెబ్‌నగర్‌కు చెందిన విద్యుత్ శాఖ ఉద్యోగి ప్రశాంత్ గౌడ్ (41), ఆయన కుమారుడు శ్రీతన్ (11)గా గుర్తించారు.

ఈ కుటుంబం సూర్యగిరి ఎల్లమ్మ ఆలయంలో ఆశీస్సులు పొందేందుకు బైకుపై ప్రయాణిస్తోంది. రావిర్యాల సమీపంలో, గుర్తుతెలియని వాహనం వారి బైక్‌ను ఢీకొనడంతో ఈ ప్రమాదం సంభవించింది. ఈ ధాటికి ప్రశాంత్ గౌడ్, అతని కుమారుడు తీవ్ర రక్తస్రావ గాయాలతో అక్కడికక్కడే మరణించారు. అతని భార్య వాణి, కుమార్తె శశిక తీవ్ర గాయాలకు గురయ్యారు. వారిని చికిత్స నిమిత్తం తుక్కుగూడలోని సమీప ప్రైవేట్ ఆసుపత్రికి హుటాహుటిన తరలించారు. వారి పరిస్థితి నిలకడగా ఉందని వైద్యులు తెలిపారు. ఈ ఘటనపై కేసు నమోదు చేసుకున్న ఆదిభట్ల పోలీసులు మృతదేహాలను స్వాధీనం చేసుకుని పోస్టుమార్టం నిమిత్తం మార్చురీకి తరలించారు.