న్యూఢిల్లీ: ఎర్రకోట(Explosion near Red Fort) సమీపంలో జరిగిన పేలుడు(Delhi car explosion) ఘటనకు సంబంధించి ఢిల్లీ పోలీసులు(Delhi Police) మంగళవారం చట్టవిరుద్ధ కార్యకలాపాల (నివారణ) చట్టం, పేలుడు పదార్థాల చట్టం కింద ఎఫ్ఐఆర్ నమోదు చేసినట్లు అధికారులు తెలిపారు. ఢిల్లీ పోలీసులు పలు ప్రాంతాల్లో దాడులు నిర్వహిస్తున్నారు. దేశ రాజధానిలో విమానాశ్రయం, రైల్వే స్టేషన్లు, బస్ టెర్మినల్స్ వద్ద గట్టి నిఘా ఉంచారు. చట్టవిరుద్ధ కార్యకలాపాల (నివారణ) చట్టం (UAPA), పేలుడు పదార్థాల చట్టం, బీఎన్ఎస్ సెక్షన్ల కింద కొత్వాలి పోలీస్ స్టేషన్‌లో ఎఫ్ఐఆర్  నమోదు చేయబడిందని ఒక సీనియర్ పోలీసు అధికారి తెలిపారు. 

"కొత్వాలి పోలీస్ స్టేషన్‌లో చట్టవిరుద్ధ కార్యకలాపాల (నివారణ) చట్టం (UAPA)లోని సెక్షన్లు 16, 18  పేలుడు పదార్థాల చట్టంలోని వివిధ సెక్షన్లు, బీఎన్ఎస్ కింద కేసు నమోదు చేయబడింది" అని ఢిల్లీ పోలీసులు తెలిపారు. ఈ పేలుడులో కనీసం ఎనిమిది మంది ప్రాణాలు కోల్పోగా, అనేక మంది గాయపడ్డారు. అంతకుముందు, కేంద్ర హోంమంత్రి అమిత్ షా మీడియాతో మాట్లాడుతూ, సోమవారం సాయంత్రం 7 గంటలకు ఢిల్లీలోని ఎర్రకోట(Red Fort) సమీపంలోని సుభాష్ మార్గ్ ట్రాఫిక్ సిగ్నల్ వద్ద హ్యుందాయ్ ఐ-20 కారులో పేలుడు సంభవించిందని, ఈ పేలుడులో కొంతమంది పాదచారులు గాయపడ్డారని, కొన్ని వాహనాలు దెబ్బతిన్నాయని పేర్కొన్నారు. ఢిల్లీలో జరిగిన పేలుడు తర్వాత పరిస్థితిని ప్రధానమంత్రి నరేంద్ర మోడీ సమీక్షించి, హోంమంత్రి అమిత్ షాతో మాట్లాడారని ప్రభుత్వ వర్గాలు వెల్లడించాయి. ఎర్రకోట పేలుడు కేసుకు సంబంధించి సల్మాన్, దేవేందర్ అనే ఇద్దరు వ్యక్తులను అరెస్టు చేశారు. పేలిన హ్యుందాయ్ కారు యజమానులు వీరే అని పోలీసులు తెలిపారు.