500 నోట్లు కూడా రద్దు చేయాలి

1. అప్పుడే అవినీతి అంతం అవుతుంది
2. ఏపీ సీఎం చంద్రబాబునాయుడు

న్యూఢిల్లీ, జూన్ 8: దేశంలో అవినీతి అంతం కావాలంటే రూ. 500 నోట్లను కూడా రద్దు చేయాలని ఏపీ సీఎం చంద్రబాబు నాయుడు పేర్కొన్నారు. ఓ జాతీయ మీడియాతో ఆదివారం చంద్రబాబు మాట్లాడారు. ‘కేవలం రూ. 100, రూ. 200 నోట్లు మాత్రమే ఉండాలి. రూ. 500 నోట్లను కూడా రద్దు చేయాలి.

పెద్ద నోట్లను రద్దు చేస్తేనే మనం అవినీతి అంతం చేయగలం.’ అని తెలిపారు. 2016 నవంబర్‌లో మోదీ నేతృత్వంలోని కేంద్ర ప్రభుత్వం రూ. 500, రూ. 1000 నోట్లను రద్దు చేసిన విషయం తెలిసిందే. నల్లధనం, అవినీతి మీద పోరాడేందుకే ఈ నిర్ణయం తీసుకున్నట్టు ప్రభుత్వ పెద్దలు ప్రకటించారు.

ఉచితాల గురించి కూడా చంద్రబాబు స్పందించారు. ‘ఉచితాలు అనే పదం సరైంది కాదు. గతంలో పెద్ద ఎత్తున సంక్షేమం ఉండేది కాదు. ఎన్టీఆర్ హయాంలోనే సంక్షేమం మొదలైంది. ప్రస్తుతం సంపద సృష్టించుకుంటూ సంక్షేమం అమలు చేస్తున్నాం. కానీ సమాజంలో ధనికులు, పేదలు అనే తేడా రోజురోజుకూ పెరుగుతోంది.’ అని పేర్కొన్నారు.