సర్పంచ్ ఎన్నికల్లో బీజేపీకి భారీ మద్దతు ఇవ్వాలి 

యువనేత లాడే శివ పిలుపు

హనుమకొండ,(విజయక్రాంతి): తెలంగాణలో గ్రామీణ అభివృద్ధిని వేగవంతం చేయాలంటే బీజేపీ సర్పంచ్ అభ్యర్థులనే అధిక సంఖ్యలో గెలిపించాలని యువనేత లాడే శివ ప్రజలను కోరారు. గ్రామపంచాయతీ ఎన్నికలు కేవలం స్థానిక సంస్థలకే పరిమితమైపోకుండా, కేంద్రం అందించే 15వ ఫైనాన్స్ నిధులు నేరుగా గ్రామాలకు చేరేందుకు ఈ ఎన్నికలు కీలకమని ఆయన తెలిపారు.శాయంపేట మండలంలోని 24 గ్రామపంచాయతీలలో బీజేపీ అభ్యర్థులు విజయం సాధిస్తే, భవిష్యత్తులో తెలంగాణ పల్లెల అభివృద్ధికి మరింత బలం చేకూరుతుందని లాడే శివ అభిప్రాయపడ్డారు.

గ్రామాల్లో డంపింగ్ యార్డులు, స్మశాన వాటికలు, మౌలిక వసతులు వంటి అంశాల్లో బీజేపీ అధికారం ఉన్న చోట అభివృద్ధి స్పష్టంగా కనిపిస్తోందని గుర్తుచేశారు.కరోనా మహమ్మారి సమయంలో పేదలను ఆదుకోవడంలో ప్రధానమంత్రి నరేంద్ర మోడీ చూపిన నాయకత్వాన్ని ప్రత్యేకంగా ప్రస్తావించి,ఉచిత రేషన్ బియ్యం, కరోనా వ్యాక్సిన్, జీరో బ్యాలెన్స్ ఖాతాల్లో ఆర్థిక సహాయం వంటి అనేక సంక్షేమ పథకాలు కేంద్రం అమలు చేసి కోట్లాది మందిని కాపాడిన విషయాన్ని గుర్తుచేశారు.ఈ సేవలకు గుర్తుగా, గ్రామపంచాయతీ ఎన్నికల్లో బీజేపీ సర్పంచ్‌లను గెలిపించి మోడీకి బహుమతిగా అందిద్దాం అని పిలుపునిచ్చారు. తెలంగాణ గ్రామాలు మరింత అభివృద్ధి చెందాలంటే ఈ ఎన్నికల్లో ప్రజలు సక్రమంగా ఆలోచించి ఓటు వేయాలని యువనేత లాడే శివ ఆకాంక్ష వ్యక్తం చేశారు.