చిన్ని తాబేలును నేనే!

ప్రపంచంలోనే అతి చిన్న తాబేలు ఇది. దీని పేరు  చెర్సోబియస్ సిగ్నాటస్. దీని స్వస్థలం దక్షిణాఫ్రికా. ఇది ఎడారి తాబేలు రకానికి చెందిన జీవి. అంటే ఈత రాదు. నీటిలో జీవించదు. నేల మీద చిన్న చిన్న రాళ్ల మధ్య బతుకుతుంది. మొక్కలు, గడ్డిని ఆహారంగా తీసుకుంటుంది. ఈ తాబేలులో మగవి ఆరు నుంచి ఎనిమిది సెంటీమీటర్ల వరకు పెరుగుతుంది. ఆడవేమో పది సెంటీమీటర్ల వరకు పెరుగుతాయి.

వీటి బరువు సుమారు 95-165 గ్రాముల మధ్య ఉంటుంది. వీటి షెల్ గోధుమ రంగులో ఉంటుంది. ఇవి తడి నేలలో గుడ్లు పెడతాయి. వీటి నుంచి 100-120 రోజుల తర్వాత పిల్లలు బయటకు వస్తాయి. అప్పుడే పుట్టిన పిల్లలు ఏడు గ్రాముల కంటే కూడా తక్కువ బరువు ఉంటాయి. పర్యావరణ మార్పులు, ఇతర జంతువుల వేట, అక్రమ రవాణా చేయడం వల్ల వీటి సంఖ్య రోజు రోజుకూ బాగా తగ్గిపోతున్నది.